Drejtori i ri i Policisë sigurohet që KFOR-i do të bashkëpunojë me ta

Drejtori i Përgjithshëm i Policisë së Kosovës Rashit Qalaj ka pritur në takim zyrtar gjeneralin e KFOR-it Salvatore Cuoci.

Drejtori i Policisë e njoftoi gjeneralin e KFOR-it për angazhimet dhe synimet drejt përmbushjes së detyrave dhe obligimeve të saj ligjore, në të mirë të sigurisë dhe rendit në Republikën e Kosovës.

“Policia e Kosovës ka kapacitete profesionale dhe është e përgatitur që të ofrojë siguri, të luftojë kundër krimit të organizuar, krimit trans kufitar, si dhe të bashkëpunojë ngushtë me të gjitha institucionet relevante vendore dhe ndërkombëtare, dhe si rezultat i nevojës së angazhimit, bashkëpunimit dhe inkuadrimit të Policisë së Kosovës në mekanizma ndërkombëtarë”, thuhet në njoftimin e Policisë.

U veçua se Policia e Kosovës ka bashkëpunim të mirë me autoritet e KFOR-it, bashkëpunim ky i cili ka treguar rezultate pozitive në fusha të ndryshme, duke përfshirë edhe sukseset në patrullimet e përbashkëta, kryesisht në brezin kufitar.

Gjatë takimit u zotua për bashkëpunim të ndërsjellë edhe në të ardhmen, duke përfshirë edhe shkëmbimin e përvojave dhe trajnimeve fushore, me qëllim të avancimit të mëtejmë të të dy institucioneve, e që kanë synime të përbashkëta në sigurinë e vendit dhe qytetarëve.