15 vjet nga vrasja e politikanes suedeze nga një serb – Përkrahu bombardimet e NATO-s kundër Serbisë

Më 10 shtator 2003, anëtarja e qeverisë suedeze ishte goditur disa herë me thikë nga një serb në një dyqan në Stokholm.

Lindh ishte goditur me thikë në gjoks dhe në stomak, ndërsa pas tetë orëve operacion, ajo kishte ndërruar jetë, pasi nuk kishte arritur t’u shpëtonte plagëve të rënda që i ishin shkaktuar.

Për vrasjen e saj, 25 vjeçari serb, Mijailo Mijailoviç ishte dënuar me burg të përjetshëm.

Në Gjykatë, ai kishte deklaruar se zërat brenda kokës së tij i kishin thënë ta sulmonte Lindhin, e cila ishte pretendentja kryesore për postin e kryeministrit në Suedi.

Dyshimet e para të hetuesve kishin qenë që vrasja e saj ishte e motivuar politikisht, pasi ajo kishte qenë politikania më e zëshme suedeze për referendumin e euros që ishte mbajtur atë kohë në Suedi. Ajo insistonte që vendi i saj t’i bashkohet monedhës së përbashkët evropiane.

Por, pistat e hetimit më vonë ndryshuan.

Dyshohet që drejt vrasjes së saj, 25 vjeçarin serb e shtynë deklaratat pro bombardimeve të NATO-s kundër Serbisë dhe qëndrimet pro pavarësisë së Kosovës.

Por, pas 8 viteve, i dënuari për vrasje kishte pranuar të flas edhe njëherë për këtë çështje nga burgu.

Më vonë, ai mohoi se ishte nxitur nga qëndrimet e ish-ministres së jashtme për bombardimet e NATO-s kundër Serbisë.

Sipas tij, e gjitha ishte rastësi.

“Unë kam ndjerë urrejtje për politikanët, si në Suedi, ashtu edhe në Serbi. Ata i fajësova për të gjitha dështimet e mia në jetë”, citojnë mediat 25 vjeçarin serb.

Policia kishte arritur ta arrestonte atë, dy javë pas sulmit. Përveç dënimit me burg të përjetshëm, ai ishte i detyruar që t’ua paguante 11 mijë sterlina për burrin e Anna Lindh dhe dy djemët e saj.

Mijailoviç, i cili ishte biri i emigrantëve serbë, kishte treguar se si e kishte therur atë disa herë në një dyqan ku po bënte blerje. Por, kishte thënë se nuk kishte për qëllim ta vriste.

Por, Gjykata më pas kishte vendosur që 25 vjeçari kishte kryer vrasjen me vetëdije të plotë, andaj nuk kishte nevojë për kujdes psikiatrik.

Ndërsa, vrasësi kishte thënë se në vend të Anna Lindh do të mund të kishte qenë dikush tjetër.

Lindh kishte qenë një politikanet më të njohura dhe më të respektuara në krejt vendin. Ajo kishte qenë e martuar dhe kishte pasur dy fëmijë, ndërsa postin e ministres së jashtme e kishte marrë në viti 1998, pas një karriere të shkëlqyer politike që kishte pasur si pjesë e Partisë Socialdemokrate. /Periskopi