“Thaçi po na shkelë, ka harruar ankthin që ne kemi”

Megjithëse ata, kishin bërë kërkesë që në fazën e fundit të dialogut të jetë edhe një përfaqësues i tyre, kishin marrë përgjigje negative nga ana e institucioneve të vendit.

Shumë nëna vazhdojnë të ndjejnë ankthin dhe dhimbjen për familjarët që tash e sa vite rezultojnë si të zhdukur.

Luljeta Sharanit, serbët ia vranë bashkëshortin, dy djemtë dhe tre kunetërit.

Ajo thotë se janë të zhgënjyer me institucionet e Kosovës, pasi që asnjëherë çështjen e personave të pagjetur nuk e trajtuan seriozisht.

“Serbët më kanë vrarë bashkëshortin, dy djemtë dhe tre kundetërit. Derisa atyre iu gjenden eshtrat unë jetoja me ankth e dhimbje ditë e natë. Është gabim i rëndë, është gabim fatal që Kosova nuk i jep kurrfarë kushte Serbisë në dialog. Ata po shkojnë krye në vete dhe po bëjnë marrëveshje të ndryshme me serbët. Si nuk iu vie turp të na shkelin, jemi të zhgënjyer s’ka s si bëhet më keq derisa shtetin armik po e falin e po bëjnë pajtime”, ka thënë ajo në një bisedë për Indeksonline.

Sharani thotë se të gjithë ata që kryen krime në Kosovë duhet të dalin para drejtësisë, dhe të marrin dënimin e merituar.

“Kërkesa jonë edhe e të gjitha nanave është që ata të dalin para drejtësisë. Mos le t’iu përmbushet asnjë kusht sepse po na hynë në hak. Duhet të bisedojnë me familjarët e të pagjeturve, të na pyesin për dhimbjen që po e ndiejnë zemrat tona. Na i kanë tha shpirtat, humbjen e tyre do e vujmë gjithë jetën. Gjithë ai gjakë që është derdh. Presidenti gjithçka po vulos në emër të vetin, po na shkelë, po ta kishte përjetu ai tmerrin që e kemi përjetu si unë si shumë nana atëherë do të kishte menduar më gjatë.”, ka thënë tutje ajo.

Hiç më lehtë jetën nuk e ka as nëna gjakovare, Ferdonije Qerkezi .

Serbët, asaj ia vranë bashkëshortin dhe katër djemtë.

“Çfarë të them, jo vetëm unë por të gjitha nënat janë të zhgënjyera me qeverinë tonë. Asgjë nuk kanë bërë për personat e zhdukur, ata kanë punuar shumë pak lidhur me këtë brengë që neve po na tmerron qe sa vite. Kishim shpresa tek UNMIK-u, pastaj tek EULEX-i, por kot!”, ka thënë Qerkezi për Indeksonline.

Sipas saj, institucionet e vendit do të mund të bënin më shumë lidhur me këtë çështje.

“Ne kishim kërkesë që të na përfaqësojë Nysrete Kumnova, por ata nuk ishin të gatshëm, nuk na kanë kthyer asnjë përgjigje me sa di unë. Ne kemi vetëm një kërkesë që me i gjetë të pagjeturit . Ata duhet të dijnë për çka u dhënë gjithë ky gjak, për çfarë është bërë gjithë ajo luftë.”, ka theksuar ajo.

Familjarë të personave të pagjetur kanë kërkuar në vazhdimësi angazhimin e të gjithë faktorëve vendor e ndërkombëtarë për zgjidhjen e kësaj çështje.