Mali i Zi së shpejti heq taksën e sigurimit të automjeteve për shtetasit kosovarë

Lajmi është bërë i ditur nga Ministria e Infrastrukturës, ministri i së cilës, Pal Lekaj po qëndron sot në Podgoricë me ftesë ministrit për Transport dhe Çështje Detare të Malit të Zi, Osman Nurkoviq.

Të dy ministrat janë dakorduar që së shpejti të hiqen edhe sigurimet kufitare të autopërgjegjësisë mes dy vendeve, në mënyrë që qytetarët e të dyja vendeve ta kenë më të lehtë dhe më të shpejtë qarkullimin në kufi.

Ministri Lekaj, lidhur me nënshkrimin e kësaj marrëveshje dhe arritjes së dakordancës për heqjen e sigurimeve kufitare të autopërgjegjësisë ndërmjet dy vendeve, ka thënë se pas diskutimeve me Ministrin Nurkoviq për zhvillimet e përgjithshme në të dy vendet tona, me theks të veçantë për sa i përket ministrive që udhëheqim, “diskutuam edhe për të ardhmen e projektit të tunelit, që do t’i lidhë Pejën me Rozhajen (i gjatë 7 kilometra) dhe lidhjes përmes hekurudhave që është një investim kapital, investime këto që sjellin përafrim e integrim të dy shteteve tona në korridore të rëndësishme të transportit ndërkombëtarë”.

“Ne presim që shumë shpejt të dalim me rezultate konkrete nga ekipet tona tashmë të emëruara, për sa i përket këtyre projekteve”, tha Lekaj, raporton Koha.net.

Marrëveshja e cila u konkretizuar sot, sipas Lekaj, do të lehtësojë pajisjen me leje përkatëse, do të kemi lëvizje më të lirë të transportueseve të të dy vendeve tona, por edhe me vendet e treta, duke i përdorur Kosovën dhe Malin e Zi si vende transiti.

Ai tha se në takim nuk është lënë anash as diskutimi dhe dakordimi për largimin e barrierave administrative, siç është taksa për autopërgjegjësinë, taksë kjo e imponuar nga ana e Malit të Zi.

“Për modalitetet e marrëveshjes, ju mbetet që ministritë e linjës të gjejnë modalitetet e duhura që kjo taksë të hiqet sa ma parë”, është shprehur ministri Pal Lekaj.