Dy vëllezërit dhe kunata – punësimet e dyshimta të familjarëve të Imet Rrahmanit në Gjilan

Rrahmani, i cili ka ndikim të fuqishëm në Komunën e Gjilanit, për shkak të postit të tij si nënkryetar i Degës së LDK-së në Gjilan dhe afërsisë me kryetarin e Gjilanit, Lutfi Haziri, kohë më parë kishte rehatuar dy familjarë të tij, vëllain dhe kunatën, vetëm në ndërmarrjen publike në Gjilan “Hidromorava”, ndërsa vëllain tjetër e ka punësuar në Entin Higjienik të Spitalit të Gjilanit, ku punon edhe vet.

Rrahmani është përkujdesur që në “Hidromoravë” të punësohen vëllai i tij Izet Rrahmani dhe kunata, bashkëshortja e vëllait të tij, Muharrem Rrahmani, Makfire Kadriu.

Megjithatë, vëllai i tij Izet Rrahmani ishte larguar nga ndërmarrja pas 2 muajsh punë, pas reagimit të opozitës në Gjilan, përkatësisht Partisë Demokratike të Kosovës. Për këtë arsye, ka një muaj që Izet Rrahmani më nuk është pjesë e ndërmarrjes “Hidromorava”.

I kontaktuar nga Periskopi, asamblisti i PDK-së, Bujar Nevzati ka thënë se vëllai i Imet Rrahmanit, Izeti, ishte larguar nga “Hidromorava” pas reagimit të tij para 1 muaji, në mbledhjen e fundit të Asamblesë Komunale të Gjilanit.

“Pasi që kisha reaguar në mbledhjen e fundit të Kuvendit Komunal, para 1 muaji, Izet Rrahmani u largua nga ky vend pune, pasi që kishte punuar për 2 muaj rresht”, tha ai.

Megjithatë, kunata e deputetit Rrahmani, Makfire Kadriu, vazhdon të punoj në ndërmarrjen publike, derisa rrethanat e punësimit të saj mbeten të panjohura.

Asnjë konkurs i publikuar, asnjë njoftim për punësim nga ana e kompanisë “Hidromorava”. Përpjekjet e disaherta të Periskopit për të kontaktuar me zyrtarë të ndërmarrjes me qëllimin që të ofrohen informacionet mbi procedurat e punësimit të familjarëve të Rrahmanit, kanë dështuar, për shkak se askush nga ndërmarrja nuk i është përgjigjur telefonatave dhe porosisë elektronike të redaksisë.

Madje, telefonatave të Periskopit nga “Hidromorava” nuk i janë përgjigjur as në numrin për përkujdesje ndaj konsumatorëve, që është lënë publik në uebsajtin e ndërmarrjes, e që përbën një papërgjegjësi në vete.

Deputeti Rrahmani është përkujdesur që ta punësoj edhe vëllain tjetër, Muharrem Rrahmanin.

Muharremi, falë vëllait të tij, ka një pozitë në Entin Higjienik të Spitalit të Përgjithëm në Komunën e Gjilanit. Edhe në këtë rast punësimi ka qenë e pamundur që të gjenden njoftimet për konkursin që çoi në punësimin e tij. Ndërsa, disa telefonatave që i janë bërë spitalit, kanë mbetur pa përgjigje.

Të gjithë familjarët e punësuar të deputetit, në rrjete sociale, kanë përkrahur Rrahmanin në garat politike. Fotografi, video, e fjalime të tij gjenden në profilet e familjarëve të Rrahmanit.

Për të ofruar një sqarim për lexuesit, Periskopi është përpjekur që të kontaktoj me vet deputetin Imet Rrahmani, por edhe me të kontakti ka qenë i pamundur nëpërmjet telefonit. /Periskopi/