Bërnabiq: Ende s’e kemi diskutuar ndarjen e Kosovës si opsion

Qeveria ende nuk ka ndonjë qëndrim zyrtar lidhur me çështjen e Kosovës por do të koncentrohet në opsionet që janë në tavolinë, ka thënë kryeministrja serbe, Ana Brnabiq.

“Vuçiq është duke bërë më të mirën për arritjen e një zgjidhje dhe nuk mendoj se arritja e një kompromisi është afër, por po kërkojmë për të dhe në të gjitha anët palët janë të koncentruara për këtë. Ai është duke u munduar ta zgjidhë këtë problem’, ka thënë Brnabiq, transmeton Periskopi.

E pyetur lidhur me deklaratat e Daçiqit se ndarja e Kosovës do të ishte opsioni më i mirë, ajo ka thënë se këto deklarata janë bërë nga Daçiq si udhëheqës i politikës së jashtme por se qeveria serbe ende nuk ka diskutuar një gjë të tillë.

“Çdokush mund të jap mendimet e tij, a mund të ketë ndarje apo jo, ne do të presim deri sat ë marrim kontrollin e plotë në provincën jugore”, ka thënë ajo.

Ajo ka thënë se nuk e di se sa do të jetë e mundur të arrihet një marrëveshje me Kosovën deri në fund të vitit duke shtuar se Vuçiq po bën gjithçka që është e mundur që të mos ua lë gjeneratave të ardhshme një konflikt të ngrirë.

“Por kjo nuk varet vetëm nga presidenti Vuçiq, edhe qeveria do ta jap mbështetjen e saj, por kjo varet edhe nga Prishtina, sa janë të hapur ata në bisedime”, ka thënë ajo.

“Besoj që mund të arrihet një marrëveshje dhe ata që duan situate të mbetet në këtë lloj konflikti të ngrirë nuk kanë kurajon dhe nuk e kanë idenë e përgjegjësisë”, ka thënë Bërnabiq duke iu referuar opozitës në Serbi./Periskopi