Ministria i jep kompetenca të jashtëligjshme Sindikatës së Shëndetësisë

Ministria e Shëndetësisë jashtëligjshëm u ka dhënë kompetenca që nuk i takojnë me ligj Federatës Sindikale të Shëndetësisë së Kosovës (FSShK).

Javë me parë, ministri i Shëndetësisë, Uran Ismaili, ka nënshkruar Kontratën Sektoriale Kolektive me kryetarin e FSShK-së, Blerim Syla, shkruan sot Koha Ditore.

Përveç rritjes së pagesës për kujdestari, Kryesia e kësaj sindikate ka siguruar edhe “përfitime” të tjera. Mes tjerash MSH-ja ka marrë për obligim t’u sigurojë hapësirën për zyrë, ndonëse sindikata vite më parë ka blerë një banesë me mbi 100 metra katrorë në qendër të Prishtinës, po për këtë arsye.

Kryesia e Sindikatës, po ashtu, sipas kësaj kontrate, nuk do të ketë nevojë të punojë në spitale gjatë kohës sa udhëheqin me organizatën. Ky pezullim i punës do të bëhet me pagesë. Kësisoj Kryesia e kësaj sindikate përveç që do të marrin pagat në sindikatë ata do të paguhen edhe nga puna e tyre profesionale mjekësore.

Përveç Kryesisë qendrore të FSSHK-së, “përfitime” kanë edhe degët e Sindikatës. Kryetarët e tyre kanë të drejtë që çdo muaj të kenë nga 5 ditë punë shkëputje me pagesë.