Konjufca: Thaçi po frikësohet shumë nga Specialja, ja pse nuk duhet ta udhëheqë dialogun

Shefi i Grupit Parlamentar të VV’së, Glauk Konjufca sot në Kuvend ka nisur fjalimin e tij lidhur me mandatin e Hashim Thaçit si kryenegociator në dialogun me Serbinë, duke përmendur edhe vijat e kuqe ndaj tij.

Sipas Konjucës, janë shumë arsye pse Thaçi nuk duhet të udhëheqë dialogun me Serbinë.

‘Ne e kemi një president që shkon e flet me Vuçiqin pa kurrëfarë platforme dhe e qet Kosovën në tavolinë. Përpos tri vijave të kuqe, vija e katërt duhe të jetë për vetë Thaçin sepse  ai është një person i paqëndrueshëm  për të mbrojtur interesat shtetërore’, tha Konjufca, transmeton Periskopi.

Konjufca thotë se një arsye tjetër ka të bëjë me atë se ai frikësohet tej mase nga Gjykata Speciale, prandaj edhe mund të dëmtohet ky proces.

‘Ekziston edhe një arsye tjetër. Ai është duke u frikësuar nga gjykata speciale. Frika e tij e madhe mund ta dëmtojë Kosovën në këtë proces. Edhe ne jemi kundër Speciales por ajo nuk trajtohet duke i trajtuar interesat e vendit si monedhë e kusurit në raport  me Serbinë. Ai prej fillimit e nisi këtë. U qu në një mëngjes dhe e shpalli veten të mandatuar si kryenegociator. Pa e mandatuar askush, pa folur pa asnjë subjekt politik. Ma e rëndësishme mi shtrëngu duart me Vuçiqin dhe me realizu atë vizitë, se sa me u marr vesh këtu në Parlament‘, tha Konjufca./Periskopi/