Deputeti i LDK-së thotë se partia e tij duhet ta lë Kuvendin

“Qeverisë për të qenë ligjore dhe e fuqishme, me besueshmëri, i nevojiten ti ketë 61 deputetë, nga 120 deputet sa ka parlamenti. Sipas prezantimeve politike Qeveria aktuale ka shumë më pak numra sesa i nevojiten për të shtyrë procese të thjeshta dhe të mëdha”, ka shkruar deputeti Kelmendi.

Ai ka thënë se, duke e parë se tryezat nuk po e nxjerrin rezultate dhe as afat për zgjedhje të parakohshme, mbeten vetëm dy mënyra të zgjedhjes së kësaj çështjeje.

“Mocioni, mosbesimi të cilin mund ta ngrisë opozita çdo herë kur edhe opozita i ka numrat e nevojshëm; Kur Presidenti verën se pozita nuk i ka numrat dhe në këtë rast inkurajon qeverinë të kërkoj vet mocionin e mirëbesimit”, ka vlerësuar ai.

Deputeti Kelmendi ka thënë se “opozita tashmë e ka të qartë se nuk e ka paanshmërinë e presidentit i cili inicion ngritjen e mocionit nga vetë Qeveria”.

“Nga ky realitet shohim se kemi një qeveri vetqëndruese e cila po përdorë fuqinë politike të forcës dhe mosiniciativën e presidentit. Andaj nga kjo situatë rrjedhimisht partitë opozitare obligohen të veprojnë. Partitë opozitare, në këtë rast, së pari LDK-ja duhet të paraqesë platformën e mosprezencës në parlament deri ne momentin që pozita e vendos në rend të ditës mocionin e mosbesimit apo besimit qeverisës”, ka shkruar tutje Kelmendi në reagimin e tij.

Sipas tij, dalja nga Parlamenti me këtë synim nuk paraqet rrezik, por vetëm vendosmëri politike dhe mesazh të qartë.

“Dalja nga Parlamenti me këtë synim nuk paraqet dëm për asgjë, por veçse paraqet vendosmëri politike me mesazh të qartë se nuk duhet të mbështetet Qeveria e cila nuk e ka plotëfuqishmërinë e nxjerrjes së ligjeve dhe vendimeve”, ka shkruan Kelmendi.

“Pas vendosjes se mocionit në votim atëherë opozita, me theks të veçant LDK-ja, do duhej të kthehej në parlament”, ka përfunduar ai.