Aliu: Duhet të kërkohet llogari për 53 milionëshin e Bechtelit

Kështu tha deputeti i Lëvizjes Vetëvendosje gjatë paraqitjes së arsyeve për thirrjen në seancë plenare kryeministrin Haradinaj për pagesën e 53 milionë eurove shtesë për kompaninë Bechtel & Enka në Kontratën për ndërtimin e Autostradës R6, “Arbën Xhaferi” Prishtinë-Hani i Elezit.

“Ky 53 milionësh duhet të sqarohet në tërësi, pse jepen para për pajisje kur ajo është përgjegjësi e kontraktorit për ndërprerjet është prap çështje e kontraktorit”.

“Gjendjen që po e shohim sot po e shohim se nuk do të kryhet kontrata deri në 31 dhjetor 2018. A do ta penalizojmë pastaj kompaninë Bechtel & Enka. Ky 53 milionësh quhet si penalizmi i qeverisë së Kosovës. Na sillni dokumente se si është penalizu, qysh është penalizu. Për mua s’është penalizim i Republikës së Kosovës për punën në pagesë por, është dhënë në mënyrë të parregullt”, tha ai.

Aliu tha se është shqetësues edhe raporti i ministrit Pal Lekaj në komisionin për zhvillim ekonomik lidhur me dhënien e 53 milionë euro, kompanisë Bechtel & Enka.

Sa i përket nënshkrimit të kontratës nga Qeveria e Hashim Thacit në vitin 2014 për ndërtimin e kësaj autostrade, Aliu tha se ekzekutivi ka qenë i papërgjegjshëm.

“Kur u nënshkrua kjo kontratë me 600 milionë euro, buxheti të paraparë buxhet 600 milionë euro, por vetëm për vitet 2014-2016, ishin 285 milionë euro. Qeveria ka qenë e papërgjegjshme atëherë kur e ka nënshkruar kjo kontratë, sepse ka ndarë aq pak buxhet që nuk mund të mbulohet deri në përfundim të kësaj kontrate”, shtoi ai