VMRO e Maqedonisë kërkon zgjedhje të parakohshme e qeveri teknike

Ky është reagimi i parë i nismës për reforma në VMRO lidhur me tubimin që ky subjekt pati mbrëmë.

Aty u fol edhe lidhur me qëndrimet rreth emrit,  ku kërkohet që partia të tregojë pragmatizëm.

“Duhet të jemi pragmatik, qëndrimi final duhet të merret sipas rrethanave dhe mundësive në periudhën e ardhshme, pasi dinamika lidhur me kontestin ka qenë e madhe deri më tani, në mënyrë plotësuese dy deri tre fish do të rritet në dy muajt e ardhshëm, kështu që, është e drejtë legjitime e liderit të opozitës t’i theksojë këto të drejta, tani nëse ato do të japin rezultat dhe nëse do të ketë zgjedhje të parakohshme dhe çfarë do të thotë kjo në aspekt kohor, radhën e ka pushteti aktual. Çështjet më të mëdha me të cilat duhet të ballafaqohet kryesia aktuale e VMRO-DPMNE-së do të vijojnë tek tani”,  deklaroi Ilia Iliovski nga Nisma për reforma në VMRO-DPMNE.

Në protestën e parë antiqeveritare kreu i VMRO-DPMNE-së, Hristijan Mickoski kërkoi zgjedhje të jashtëzakonshme parlamentare së bashku me ato presidenciale, që do t’i zbatojë Qeveria teknike dhe kryetari i KSHZ-së nga radhët e opozitës.

Mickovski kërkoi ndihmën e shqiptarëve për të mposhtur Zaevin. Rreth çështjes së emrit, Mickoski përsëriti se opozita nuk do të pranojë ndryshimin e Kushtetutës për ndërrimin e emrit të shtetit. Analisti Albert Musliu tha se protesta e mbrëmshme më tepër i ngjasonte konsolidimit brendapartiak se sa protestës opozitare. Ai tha se ndryshimi i kushtetutës është i pamundur me përbërjen e këtillë të parlamentit.

Edhe pse nuk u parqit në protestë, ish kreu i VMRO-së Nikolla Gruevski nëpërmjet Facebook protestën e cilësoi si të suksesshme dhe fuqishme. Nga LSDM shprehen se kërkesa për zgjedhje të parakohshme është blof, ndërsa akuzuan Mickovskin se vazhdon të ndjekë rrugën e Nikolla Gruevskit.