Vëllai i Xhevë Lladrovcit: Të mos luhet me certifikatat e veteranëve

Jeta dhe vepra e heroinës Xhevë Lladrovci është përkujtuar sot në 63 vjetorin e lindjes së saj.

Xhevë Krasniqi-Lladrovci ka qenë luftëtare e UÇK-së dhe ka rënë dëshmore në shtatorin e vitit 1998 bashkë me bashkëshortin e saj Fehmi Lladrovci.

Xhevë Krasniqi Lladrovci është krahasuar me heroinën Shotë Galica e cila luftoi përkrah burrit të saj Azem Galicës.

Në një akademi përkujtimore  të organizuar sot nga Ministria e Diasporës Xhevë Lladrovci u konsiderua si një grua e cila u bë udhërrëfyese për të fituar lirinë.

Zëvendësministri i Diasporës Isni Kilaj duke folur për virtytet e Xhevës u shpreh se ajo është fytyra më emblematike e të gjitha kohërave.

“Ajo nuk kishte si të ishte ndryshe sepse lindi e u rrit nga një familje e madhe patriotike nga babi Avdyli e nënë Xhemilja të lindur, rritur e brymosur me atdhe dashuri e të gatshëm deri në flijim. E brymosi Xhevën me tipare për një njeri me virtytet më njerëzore e patriotike me personalitetin më kompleks shqiptar e njerëzor, të një luftëtareje epike deri në një sakrificë sublime për liri e ideale shqiptare për jetë e nder”, tha Kilaj.

Fjalë të mëdha për veprën dhe jetën e Xhevë dhe Fehmi Lladrovcit tha edhe  nënkryetari i OVL-UÇK-së, Nasim Haradinaj i cili u shpreh se këta dy  i përkasin gjerdanit të heronjve të atdheut.

“Shembulli i tyre, sjellja e tyre dhe jeta e tyre e dinjitetshme u bënë udhërrëfyesi i popullit tonë i burrave dhe grave tjera si Fehmiu dhe Xheva të cilët në ditët më të rënda arritën ta organizojnë rezistencën gjithë popullore mbarë Kosovë duke dëbuar okupatorin serb. Fehmi e Xhevë Ladrovci kanë qenë dhe kanë mbetur ndër figurat më emblematike të UÇK-së ata kanë lindur dhe janë rritur në një ambient të fuqishëm”, tha Haradinaj.

Të pranishëm në këtë akademi përkujtimore ishin edhe familjarët e Xhevë Krasniqit Lladrovcit të cilët thanë se dëshmorët që ranë për lirinë e Kosovës nderohen duke pasur një vend të pa korruptuar, me ushtri dhe polici të forët.

Vëllau i Xhevë Lladrovcit, Selim Krasniqi u shpreh se për të nderuar ata që ranë në fushën e nderit duhej të kishim një shëndetësi e drejtësi të mirë.

“Ata do të dëshironin që të vendosnim vet për fatet tona, pa pasur nevojë që t’i pyesnim ata që na vranë dhe masakruan, na dogjën e na përzunë nga vatrat tona. Jam i bindur se të gjithë ata që ranë në altarin e lirisë do të donin një vend ku nuk do të bëhej biznes me certifikata e aq më pak do të kishim menduar një vend  ku ne nga një luftë çlirimtare do të dënoheshin për kriminel e bile edhe të formoheshin edhe Gjykata Speciale për dënimin e luftës tonë të lavdishme”, ka thënë Krasniqi.

Sipas tij për të nderuar dëshmorët që ranë për liri  duhet të bashkohen dhe të punojnë për të mirën e vendit.

Disa fjalë për luftëtaren, Xhevë Lladrovci i tha edhe i biri i heroit Hamzë Jashari, i cili njëherësh është edhe kryetari i Skenderajt, Bekim Jashari.

Sipas tij Xheva ishte grua e pendës dhe e pushkës.

“Ishte një grua e pashoqe, e pendës e pushkës e të gjithave me një fjalë. Ndoshta nuk gaboj të them se ishte edhe më shumë se Shote Galica. Unë ndihem krenar për kohën dhe takimet që i kemi pasur në atë kohë“, tha Jashari.

Në këtë ceremoni ku u përkujtua luftëtarja e parë e Ushtrisë Çlirimtare të Kosovës Xhevë Krasniqi Lladrovci , ministria e Diasporës dhe Investimeve Strategjike i ndau mirënjohje familje së saj për kontributin që ajo dha për liri.