Ministri Bytyqi zotohet se do të punojë për të ardhme më të mirë për fëmijët

Ministri i Arsimit, Shkencës dhe Teknologjisë, Shyqyri Bytyqi ka uruar 1 Qershorin, ditën botërore të fëmijëve, duke u zotuar se do të punojnë më shumë për të siguruar të ardhme më të mirë për fëmijët.

“Sot, bota shënon ditën më të rëndësishme: 1 Qershorin – Ditën Ndërkombëtare të Fëmijëve. Në këtë ditë, zotohemi se do të punojmë të gjithë së bashku për të siguruar të ardhme më të mirë për fëmijët tanë, duke iu siguruar ambiente të shëndetshme në kopshte dhe shkolla, mësimdhënës të përgatitur mirë dhe tekste cilësore”, ka shkruar Bytyqi, përcjell KosovaPress.

Ai ka shtuar se fëmijët janë e ardhmja e çdo vendi dhe investimi në ta është investim në të ardhmen.

“Prandaj, sot, në këtë ditë të rëndësishme, i ftoj të gjithë prindërit, mësimdhënësit, përfaqësuesit e institucioneve arsimore dhe shtetërore, që ta kenë çdo ditë në agjendë mirëqenien dhe arsimimin e fëmijëve. Të gjithë së bashku do të mund të përgatisim qytetarë të përgatitur mirë për sfidat e shekullit”, ka shkruar tutje Ministri Bytyqi, duke e shoqëruar publikimin në rrjetin social Facebook me videon e mëposhtme.