Dardan Molliqaj akuza të rënda për Vetëvendosjen: Jeni bërë hipokritë

Molliqaj tha se së fundmi po bëhet lojë se kush i ka e kush jo numrat për rrëzimin e Qeverisë Haradinaj.

“Unë po i prezantoj shifrat ashtu siç e di që janë, e jo siç po tentohet të manipulohet në opinion. Partitë opozitare i kanë 58 deputetë, 9 deputetë të Listës Serbe edhe 53 të koalicionit qeverisës. Të gjithë që jemi në opozitë e kemi kritiku me të madhe Qeverinë, e ata që janë në koalicion janë ndje keq sepse Qeveria u krijua nga Lista Serbe, që ndikohet nga Beogradi”, tha Molliqaj.

Ai kërkoi përgjigje nga Lëvizja Vetëvendosje se nëse ka ndërruar qëndrim për rrëzimin e Qeverisë, por jo me votat e Listës Serbe.

“A e ka ndërru qëndrimin Lëvizja Vetëvendosje për këtë punë, apo janë gati me rrëzu Qeverinë edhe me deputetë serbë. PSD qysh sot ua jep nënshkrimet Vetëvendosjes për rrëzimin e Qeverisë, nëse shkojnë e i marrin votat e Listës Serbe. Është mirë mos me u fsheh. Duhet të bëhet opozita bashkë, e ta formulojmë një strategji për shkuarjen në zgjedhje”, tha Molliqaj.

Ai vazhdoi akuzat ndaj Lëvizjes Vetëvendosje për lojë të dyfishtë.

“Nëse e keni për zgjedhje, shkoni merrni nënshkrimet e hajdi jau japim edhe ne. Nëse nuk e keni pernime, mos boni zhurmë në publik. Prej meje e keni kërkesë me tregu a e keni ndërru qëndrimin, apo e rrëzoni Qeverinë edhe me votat e Listës Serbe. Është e pandershme sulmi që po bëhet. E keni vazhdu bashkëpunimin me PDK’në e LDK’në në Komunën e Prishtinës. Hipokrizia nuk po ndalet. Jeni ba bashkë me PDK’në e LDK’në për me blloku qeverisjen në Komunë”, deklaroi tutje Molliqaj./Periskopi