Surroi thotë se VV dhe PSD ia kanë lodhur kokën

Publicistja Flaka Surroi ka botuar një tjetër shkrim në portalin KOHA ku merret me një varg temash të ndryshme të cilave harron t’iu vë një bosht i cili do t’i magnetizonte, siç ndodh rëndom në shkrime të tilla autoriale, shkruan Periskopi.

Shkrimi i saj i titulluar “Nebulozat” fillon me pyetjen: Çka ka të re në Kosovë? Përgjigjjet në këtë pyetje e konstituojnë përmbajtjen e këtij shkrimi. Ajo merret me korrupsionin, ligjin për media, debatin mes aktivistëve të VV-së dhe PSD-së dhe me dialogun Kosovë Serbi.

Ajo që mund të zgjojë interes për lexuesit tanë është pjesa ku shkruan në lidhje me përplasjet mes Lëvizjes Vetëvendosje dhe Partisë Socialdemokrate. Surroi thotë se kjo gjë “ia ka lodhur kokën me debatin e padinjitetshëm që nuk çon askund.”

Ajo mendon se këto dy parti që dikur ishin një, i kanë harruar problemet e qytetarëve duke u marrë me sharjet e njëri-tjetrit. “Po të kishin një grimë ndërgjegjje, si njëra, ashtu edhe pala tjetër, do të duhej të përqendroheshin në problemet të cilat i kemi. Nëse e kanë fuqinë e votës, e këtë e kanë kur të bëhen bashkë, le të shkojnë të marrin vendime që nuk e dëmtojnë Kosovën.” – shkruan ndër tjerash Surroi.

Lexoni shkrimin e plotë duke klikuar këtu.