Policia jep detaje për personin i cili u akuzua se tentoi ta kidnapojë Milaim Zekën

Më herët u raportua se ditë më parë dy persona kanë tentuar ta kidnapojnë deputetin e Nismës, Milaim Zeka.

Periskopi ka kontaktuar deputetin Zeka i cili ka thënë se nuk don ta komentojë këtë rast pasi që Policia është duke e hetuar.

Zëdhënësi i Policisë, Agron Borovci, e ka konfirmuar për Periskopin se rasti i raportuar nga Milaim Zeka është nën hetime.

“Më datë 17.05.2018 është raportuar rasti nga ana e ankuesit M.Z.  Me rekomandimin e prokurorit të shtetit rasti është cilësuar si ngacmim dhe policia ka nisur një hetim lidhur me rrethanat që e karakterizojnë atë”, ka thënë Borovci.

Mirëpo sipas tij, nga hetimi preliminar ka rezultuar se vetura nga e cila është ndjerë i shqetësuar ose i ngacmuar ankuesi, ka qenë duke u drejtuar nga një i mitur, i cili pasi është ndaluar nga policia është konstatuar se nuk ka poseduar patentë shoferi për drejtim automjeti.

“Për këtë ndaj tij është shqiptuar masa administrative për kundërvajtje, përderisa për pjesën e ngacmimit policia është duke u punuar me qëllim hetimin dhe sqarimin e të gjitha rrethanave”, tha Borovci.

Rasti ka ndodhur në rrugën ‘B’ në Prishtinë. /Periskopi.