Pacolli trullos me metafora homologët evropianë, lexojeni çka u ka thënë

Zëvendëskryeministri dhe ministri i Punëve të Jashtme, Behgjet Pacolli ka postuar në Facebook, pjesë nga bisedat që ua ka thënë homologëve të tij nga Bashkimi Europian në një takim në Greqi.

“Mos e harroni Kosovën. Kosova është krijesë e Bashkimit Europian dhe ne jemi pjesë natyrale e Europës. Baballarët që udhëtonin me hekurudhë përgjatë Europës 50 vjet më parë e kanë të vështirë t’i shpjegojnë fëmijëve të tyre sot pse ata nuk mund të udhëtojnë- i thashë homologëve nga Bashkimi Europian mbledhur në Greqi”, shkruan Pacolli, transmeton Periskopi.

Ai thotë se u ka treguar diplomatëve evropianë, se Kosova rrezikon të mbetet një vend i izoluar për shkak të mosliberalizimit të vizave.

“Më tej thashë se një vend i krijuar nga Bashkimi Europian, me një legjislacion tërësisht sipas normave europiane, rrezikon të harrohet megjithatë, si tregon izolimi i qytetarëve të Kosovës për shkak të mungesës së liberalizimit të vizave”, shkruan Pacolli.

Në fund, po e shkëpusim metaforën e Pacollit:

“Dhe shtova një metaforë që e përjetoj herë pas herë: “për ta ilustruar rëndësinë tonë, po i referohem shembullit të fëmijëve tanë që shpesh nuk e ndërtojnë dot objektin e tyre në lojën Lego, sepse harrojnë ndonjë element të vogël… Pa ne, Europa nuk është e plotë, nuk është e qëndrueshme…. Po nëse fëmijët mund t’i këshilloj të përkujdesen për të gjithë pjesët e lojës së tyre, si përfaqësues i një vendi të vogël, e kam të vështirë t’ju këshilloj juve, përfaqësuesve të shteteve të mëdhenj. …Megjithatë ju sugjeroj: sa herë që shikoni fëmijët që luajnë këtë lojë, kujtohuni për Kosovën”, tregon Pacolli./Periskopi/