Komuniteti LGBTI tregon në Prishtinë kërcënimet me të cilat jeton çdo ditë

Menjëherë pas mbajtjes së paradës së parë për mbështetjen e grupit LGBT, shumë qytetarë kishin reaguar përmes rrjeteve sociale, duke treguar haptas mospranimin e këtij komuniteti në shoqëri.

Për këtë arsye, në Ditën Ndërkombëtare kundër Homofobisë dhe Transfobisë, Lendi Mustafa ka vendosur në një ekspozitë disa nga komentet, me të cilat i janë drejtuar persona të ndryshëm, menjëherë pas daljes së tij në mënyrë publike, raporton KTV.

E të njëjtat ofendime thotë se nuk mungojnë as në rrugë.

Ai tregon se për këtë ishte paragjykuar edhe në institucione arsimore e kjo e ka shtyrë që të mos konkurrojë për punë në disa vende.

Shefja e zyrës së BE-së në Kosovë, Natalia Apostollova, tha se ligjet në Kosovë janë të mira, por mbetet sfidë implementimi i tyre.

“Bashkimi Evropian, të cilin unë po e përfaqësoj këtu, e rikonfirmon mbështetjen e tij të plotë për luftën kundër kësaj forme diskriminimi, e cila është e bazuar në urrejtje, në baza të orientimit seksual dhe identitetin gjinor. Ne do të promovojmë dhe mbështesim aktivisht organizatat e komunitetit LGBTI në Kosovë”, ka thënë ajo.

Ndërsa ambasadori i SHBA-së, Greg Delawie, ka thënë se do ta mbështesin këtë kategori, e cila është e margjinalizuar në Kosovë.

“Fuqimisht e mbështesim hetimin dhe ndjekjen penale të kryerësve të këtij lloj ngacmimi dhe dhune. Kosova ka përparuar shumë sa i përket kësaj çështjeje brenda një periudhe të shkurtër kohore. I përgëzoj të gjithë ata që kanë punuar me ngulm për t’i tejkaluar paragjykimet dhe për t’i ndryshuar mendimet. Mos hiqni dorë, ta dini që SHBA-ja është këtu për t’ju mbështetur në çdo hap gjatë këtij rrugëtimi”, ka thënë Delawie.

Në përkrahje të kësaj kategorie ka dalë edhe ambasadori i Suedisë, Henrik Nilsson, i cili tha se përmirësimi i gjendjes së tyre është shumë i rëndësishëm për rrugën e Kosovës drejt BE-së.

Në paradën e mbajtur në tetor të 2017-ës morën pjesë rreth 500 qytetarë.