Elhami Hajdari tregon pse u suspendua nga puna nga ministri Rikalo

Elhami Hajdari edhe sot ka vazhduar me punën në zyrën e tij si kryeshefi i Agjencisë për Zhvillimin e Bujqësisë. Ai doli në punë edhe pse ka dy ditë, që ministri Nenad Rikallo, e ka suspenduar nga detyra.

Hajdari konsideron që vendimi i Rikalos nuk ka asnjë bazë ligjore.

Përmes një e-mail, kryeshefi i AZHB’së tha se kjo e gjitha është konflikt interesi.

Në vendimin e marrë nga ministri i Bujqësisë, thuhet që Elhami Hajdari është i akuzuar për veprën penale kanosje. E për këtë Prokuroria Themelore në Prishtinë e ka mohuar për T7 se kryeshefi i Agjencisë për Zhvillimin e Bujqësisë është duke u hetuar.

Gjithashtu, Hajdari e hedhë poshtë edhe arsyen e dytë të ministrit Rikalo. Ai thotë se ka raporte që e dëshmojnë punën dhe bashkëpunimin e tij me ministrinë.

E me këtë ai thotë që ministri i ka bërë presion atij për të paguar 400.000 euro për projektin e kompanisë Extra Frut Filings, marrëveshje me të cilën ka kompania e udhëhequr nga gruaja e ministrit.

Ndërkohë që, Hajdari thotë se ky nuk është i vetmi keqpërdorim që ka bërë Nenad Rikalo. Ai thotë se ka edhe tendenca për favorizime dhe keqpërdorime të tjera me vlera milionëshe.

Kabineti i  Ministrit të Bujqësisë  nuk ka kthyer përgjigje duke kërkuar nga televizioni që pyetjet drejtuar atyre t’u dërgohen në gjuhën serbe.

Ata më pas kanë refuzuar t’u përgjigjen pyetjeve dërguar në gjuhën angleze.