Zyrtari i AKR-së: S’jemi parti bllokuese, nuk e lidhim rastin e Sefajt me drejtorin e AKI-së

Kjo ka ndodhur disa ditë pas kërkesës së kryeministrit, Ramush Haradinaj, që Sefaj ‘ta lironte detyrën’, pas arrestimit dhe deportimit që gjashtë shtetasve turq, me dyshimin se janë gylenistë.

Sekretari i përgjithshëm i AKR-së, Vesel Makolli, ka thënë se Sefaj ka qenë ministri më i suksesshëm, duke pohuar se kërkesa që ai ta lironte detyrën e ministrit ka shkaktuar nervoz dhe zemërim ndër ta, njofton Klan Kosova.

“AKR-ja gjithmonë është shquar me traditën shtetformuese, duke sakrifikuar edhe interesat e saja në dobi të shtetit, çka nuk ndodh me partitë tjera. Ne jemi ata që kemi ndikuar direkt në formimin e kësaj qeverie, andaj çdo veprim i yni do të jetë së pari duke u bazuar në interesin e shtetit dhe për të mirën e tij dhe për ngritjen e imazhit të shtetit”, ka thënë Makolli për klankosova.tv.

Makolli ka deklaruar se dorëheqjen e ministrit nga partia e tyre nuk e lidhin aspak me dorëheqjen potenciale të drejtorit të AKI-së, Driton Gashi, së cilit i është bërë kërkesa e njëjtë nga Haradinaj.

“Ne nuk jemi parti bllokuese por përkundrazi, andaj nuk kemi dashtë ta lidhim rastin me shefin e AKI-së me rastin e ministrit tonë”.

“Duke u bazuar në të gjitha këto dhe duke pasë parasysh gjithmonë interesin e shtetit mbi të gjitha, Flamur Sefaj, ka pranuar kërkesën për lirim nga detyra edhe pse nuk ka qenë aspak fajtor, por ka qenë ndjenja morale që e ka shtyrë ta bëjë këtë, pas situatës së krijuar në opinionin publik. Poashtu për të kontribuuar për daljen nga kjo situatë e krijuar pa fajin e tij, ka ndërmarr këtë hap – ka dhënë dorëheqje”.

Makolli ka thënë se veprimi i Sefajt është për t’u përshëndetur pasi që me këtë vendim ai ka treguar, sipas tij, që është personalitet i nivelit të lartë intelektual e kulturor dhe që di të marrë vendime në momentet e vështira dhe të duhura.

“Sefaj e ka sakrifikuar vetën e tij për të mirën e shtetit. Ai ka treguar se shteti është mbi gjithçka”.