Standardet e dyfishta: Pas deportimit të gjashtë gylenistëve, Kosova ia njeh të drejtën për azil Ugur Toksoy

KALLXO.com ka kuptuar Ugur Toksoyt kërkesa për azil e paraqitur më datë 3 nëntor 2017 i është njohur më datën 28 mars 2018.

Lajmin për njohjen e statusit të refugjatit për Toksoyn e ka konfirmuar avokati Leutrim Syla.

Në kërkesën e tij të paraqitur më datën 3 nëntor, Toksoy kishte deklaruar se në vendin e tij të origjinës ishte objekt i përndjekjes me karakter politik dhe në rast të kthimit atje ai do të haste në dëmtime serioze për arsye politike.

Departamenti për Shtetësi, Azil dhe Migracion pranë MPB-së i ka njohur këtë të drejtë Toksoyt   duke pasur parasysh gjendjen në vendin e origjinës,  ka vlerësuar se azilkërkuesi përmbush statusin e refugjatit.

Toksoy ishte arrestuar në fund të muajit tetor të vitit të kaluar i kërkuar për t’u ekstraduar nga Republika e Turqisë nën dyshimin se kishte lidhje me Organizatën  “Feto” që autoritetet  turke e konsiderojnë si terroriste.

Pasi fillimisht i ishte caktuar paraburgimi prej 40 ditësh, Toksoy ishte liruar me dorëzani prej 5 mijë eurove.

Më 14 dhjetor të vitit të kaluar ishte mbajtur seanca për ekstradim ku prokurori i Prokurorisë Speciale të Kosovës, Ali Rexha ishte tërhequr nga kërkesa për ekstradim pasi që kishte thënë se kishte kërkuar prova nga Turqia dhe ato nuk kanë ardhur.

Për dallim nga Toksoy, fatin e ndryshëm e patën 6 bashkëkombës të tij që u dëbuan nga Republika e Kosovës më 29 mars, ndërsa në një intervistë të Toksoyt për një televizion në Kosovë tha  e kanë njoftuar se policia kishte shkuar edhe në shtëpinë e tij, por nuk e kishte gjetur aty.

6 shtetasit turq që kishin leje qëndrimi të vlefshme në Kosovë u dëbuan me arsyetimin se mund të përbënin rrezik për sigurinë kombëtare, ndërsa këtë bazë e përmendi edhe Ministria e Punëve të Brendshme në njoftimin për revokimin e lejes së qëndrimit.

KALLXO.com i ka shkruar edhe Ministrisë së Punëve të Brendshme në lidhje me çështjen e Ugur Toksoyt dhe është në pritje të përgjigjeve.