Ministri i Arsimit me dyer të mbyllura raportoi për shkarkimet në Agjencinë e Akreditimit

Me dyer të mbyllura dhe larg syrit të mediave ka raportuar 3 ditë më parë ministri Shyqiri Bytyqi në Komisionin parlamentar për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi për shkarkimin e Këshillit Shtetëror të Cilësisë (KSHC) të Agjencisë së Kosovës për Akreditim (AKA).

Ndonëse ka qenë i obliguar edhe me Ligjin për arsimin e lartë, i cili specifikon që nëse më shumë se një e treta e anëtarëve të Bordit zëvendësohen për çfarëdo arsye brenda një viti, Ministria duhet t’ia raportojë këtë Kuvendit, Bytyqi këtë e ka bërë vetëm pas rekomandimeve që i ka nxjerrë Kuvendi në një seancë të jashtëzakonshme, shkruan sot “Koha Ditore”.

Një nga rekomandimet e Kuvendit e obligonte atë që të raportonte për arsyet që e kanë çuar deri tek shkarkimet.

Gazeta ka mësuar se raportimi me dyer të mbyllura dhe larg mediave ka qenë kërkesë e vetë ministrit Shyqiri Bytyqi. Raportimi i tij është bërë të enjten nga ora 09:00 dhe ka zgjatur rreth një orë. Gjatë këtij raportimi ai ka pretenduar se Bordi i kaluar i Agjencisë ka bërë disa shkelje, megjithëse ai vetëm një prej tyre e ka paraqitur në Prokurori.

Bytyqi nuk i është përgjigjur pyetjes së gazetës nëse i ka kërkuar Komisionit që të raportojë me dyer të mbyllura dhe se çfarë faktesh i ka ofruar Komisionit për shkarkimin e Këshillit Shtetëror të Cilësisë dhe ushtrueses së detyrës së Agjencisë së Kosovës për Akreditim.