“Kthesa e vdekjes” në Tiranë-Elbasan

Çifti i bashkëshortëve Gurishta, ishin viktima të radhës të asaj që quhet njolla më e zezë e aksit Elbasan-Tirane, kthesa e parë pas tunelit të Krrabës.

Si pasojë e daljes nga rruga, mjeti ka rënë dhjetëra metra poshtë në greminë, ku për pasojë humbi jetën 55-vjeçarja dhe u plagos rëndë bashkëshorti i saj që ishte edhe drejtuesi i mjetit. Përveç faktit që kjo kthesë e dyfishtë është ngjan më tepër si një kurth për drejtuesit e mjeteve, këtu mungojnë edhe masat më elementare mbrojtëse.

Kjo është një njollë e dhe më e rrezikshmja e aksit Elbasan-Tiranë dhe përveç kësaj, prej më shumë se një muaji këtu mungonte gardreli mbrojtës, i cili ishte prishur rreth një muaj më parë nga aksidenti i fundit në këtë kthesë.

Autoriteti rrugor që ka pronësi mbi këtë rrugë, nuk e kishte parë të arsyeshme të rivendoste gardelin mbrojtës, i cili nuk ka gjatësi më të madhe se 10 metra në vendin ku mungonte. Dhe ndoshta po të ishte mbrojtësja, mjeti i çiftit Gurishta nuk do të kishte përfunduar në humnerë. Por kjo nuk është e vetmja kthesë e rrezikshme dhe pa mbrojtje. Vetëm 3 km më poshtë në drejtim të Tiranës, një tjetër kthesë e ka gardrelin e dëmtuar nga aksidenti më i fundit.

Indiferenca e autoritetit rrugor, ka bërë që edhe në këtë kthesë shenjta e aksidenti të fundit të vazhdojnë të jenë të freskëta.

Dy bashkëshortët Gurishta do të kishin mbërritur shëndoshë e mirë në shtëpinë e tyre pranë të afërmve nëse rruga e re Tiranë-Elbasan do përfundonte ndërtimin në kohë. Zvarritja e ndërtimit të rrugës së përfolur për korrupsion është shkaku aksidentit të ndodhur në këtë fillim jave, dhe ky aksident tregon se si korrupsioni të vret.