Kryeredaktori i “Kohës Ditore” thotë se ka fakte që arrestimi i Gjuriqit ishte inskenim

Kryeredaktori i “Kohës Ditore” Agron Bajrami, ka shkruar në gazetën më të madhe të Malit të Zi “Vijesti” në lidhje me vëmendjen e Kosovës për zgjedhjet presidenciale në këtë vend, që përfunduan dje me fitoren e Milo Gjukanoviqit – transmeton Periskopi.

Bajrami ka thënë që publiku kosovar nuk është aq i vëmendshëm për këto ngjarje shkaku i dy rasteve të fundit që ndodhën në Kosovë: arrestimit dhe deportimit të gjashtë shtetasve turq dhe arrestimit të Marko Gjuriqit. Të dyja këto raste, gazetari i ka quajtur “inskenime” ose “filma” të prodhuar nga politikanët kosovarë, me theks te presidenti Hashim Thaçi.

Për rastin e Gjuriqit, ai ka thënë që ka fakte që tregojnë se arrestimi ishte në të mirë të dy presidentëve Vuçiq dhe Thaçi.

“Dhe pse ta besojmë këtë? Për shkak se ekzistojnë fakte dhe rrethana që flasin në favor të kësaj teorie.

Fakt është se lajmi për arrestimin e Gjuriqit është publikuar në disa media në Mal të Zi dhe Serbi gjashtë orë përpara se të ndodhte vetë arrestimi!

Sikur që është fakt edhe kjo se arrestimi ndodhi vetëm disa ditë pas takimit “sekret” mes Vuçiqit dhe Thaçit në Amerikë, për të cilin asnjëri prej tyre nuk e njoftoi publikun, por për të cilin morëm vesh nga shumë diplomatë të huaj që e konfirmuan takimin.” – ka shkruar Bajrami.

Më tej, kryeredaktori i Kohës Ditore ka thënë që është në interes të Kosovës që të kultivojë marrëdhënie sa më të mira me Malin e Zi, duke nënkuptuar që fitorja e Gjukanoviqit i shkon në favor Kosovës për shkak të agjendës së tij pro-evropiane. /Periskopi

Lexo shkrimin e plotë në linkun që vijon: https://www.koha.net/veshtrime/87381/si-ne-hollywood-por-nuk-eshte-hollywood/