Krasniqi: Disa edhe do të bëhen ‘kurban’ në emër të luftimit të korrupsionit (Foto)

Albert Krasniqi nga Instituti Demokratik i Kosovës me një fotografi interesante ka komentuar aktakuzën që është ngritur sot në rastin ‘Pronto’, ku janë të përfshirë 11 persona.

Krasniqi ka thënë se disa persona edhe mund të bëhen ‘kurban’ në emër të luftimit të korrupsionit, duke ia përcjellur shkrimit një fotografi ku shihet Pallati i Drejtësisë dhe për rastësi një shenjë që tregon se në të majtë ‘ka kurbanë’.

‘Disa edhe do te behen “kurban” ne emer te luftimit te korrupsionit. Sa te liberalizohen vizat e mandej edhe mund te lirohen, ama edhe regjimi i vizave mund te kthehet.’, ka thënë Krasniqi në Facebook.

Në mesin e 11 të akuzuarve janë edhe ish-shefi i grupit parlamentar të PDK-së, Adem Grabovci, ministri aktual i Inovacionit dhe Ndërmarrësisë, Besim Beqaj, deputeti aktual i PDK-së, Zenun Pajaziti, ish-kryesuesi i Kuvendit të Komunës së Prizrenit, Nijazi Kryeziu dhe ish-shefja e Njësisë për furnizim në Ministrinë e Shëndetësisë, Arbenita Pajaziti, ish-sekretari i Ministrisë së Punëve të Brendshme, Ilhami Gashi, ish-zëvendësministri i Punës dhe Mirëqenies Sociale, Fatmir Shurdhaj, ish-këshilltari politik në MPB, Sedat Gashi, etj.

Të akuzuarit akuzohen për kryerjen e veprës penale “Shkelja e statusit të barabartë të shtetasve dhe banorëve të Republikës së Kosovës në bashkëkryerje”, nga neni 193 paragrafi 4 lidhur me paragrafin 1 të KPRK-së, lidhur me nenin 31 të KPRK-së, prej të cilave disa prej veprave kanë mbetur në tentativë./Periskopi/