Kosova shqyrton format e bashkëpunimit me EULEX-in në të ardhmen

Zëvendësministri i Punëve të Brendshme, Izmi Zeka ka pritur sot një delegacion të Bashkimit Evropian. Në përbërje të këtij delegacioni ishin Gabor Iklody, udhëheqës i Drejtorisë së Departamentit të Menaxhimit të Krizave dhe Planifikimit (CMPD), Xavier Denisnga, drejtoria e Menaxhimit të Krizave dhe Planifikimit (CMPD), Oliver Hoffmann – Divizioni për Drejtimin e Operacioneve (Administrim dhe Planifikim Civil – CPCC), John Manza (NATO), si dhe zyrtarë të tjerë. Në këtë takim u bisedua për rolin dhe mandatin e EULEX-it në Kosovë.

Përmes një njoftimi për media bëhet e ditur se zëvendësministri Zeka, theksoi qasjen e Ministrisë së Punëve të Brendshme dhe të institucioneve të Kosovës sa i përket vlerësimit të punës së misionit të EULEX-it në Kosovë në gjyqësor dhe polici.

“Si institucione të reja, misioni i EULEX-it na ka ndihmuar për ngritjen e kapaciteteve për rrugën tonë. Por, misionet kudo kanë një afat dhe ky mision ka përmbyllur me sukses rolin e tij në zbatimin e ligjit në Kosovë”, theksoi Zeka.

Ai vuri në pah se institucionet e zbatimit të ligjit në Kosovë kanë kapacitete të plota dhe janë të afta për menaxhimin e çfarëdo situate. Megjithatë, siç është shprehur ai, Republika e Kosovës nuk mund të funksionojë pa ndihëm e BE-së dhe SHBA-ve.

Ai në fund theksoi se tashme edhe grupi ndërministror është dukë bërë një vlerësim të punës së këtij misioni dhe në bazë të vlerësimeve që do të dalin, do të shikohet forma e bashkëpunimit në të ardhmen.