Haradinaj pret vendimet e Gjykatës për fatin e ministrave që u janë ngritur aktakuza

Kryeministri i Kosovës, Ramush Haradinaj e ka pranuar se për momentin nuk do t’i shkarkojë ministrat që kanë të ngritur aktakuza nga Gjykata.

Për këtë, shefi i ekzekutivit ka thënë se do ta presin vendimin e Gjykatës.

“Sa i përkët vendimeve që ka me marrë qeveria ndaj ministrave me aktakuzë duhet pritur vendimet nga gjykata dhe njëherë nuk mund të marrim vendim. Qeveria do të marrë vendime sipas ligjit për këtë”, ka thënë i pari i qeverisë.

Sipas Haradinajt, vetëm ngritja e aktakuzës është lajm i mirë për rendin dhe ligjin në vend.

Kryeministri së bashku me ministrin e Drejtësisë në një konferencë për media u shprehën mjaft të lumtur edhe me miratimin e Kodit të ri Penal.

Haradinaj tregoi edhe arsyen pse pika për situatën financare u mbajt me dyer të mbyllura.

Ai tha se diskutimet e tilla janë të mira, duke shtuar se ministri i Financave paraqiti para qeverisë fondet ekonomike pozitat aktuale, dhe orientimin për gjendjen financiare.

Qeveria e Kosovës miratoi Kodin e ri Penal të vendit. Në këtë kod janë rishikuar 19 nene në veprat që lidhen me korrupsionin dhe krimin e organizuar.

Kodi tash parasheh edhe që zyrtarët publikë që kryejnë vepra penale të mos mund të ushtrojnë ndonjë funksion në periudhën prej dhjetë vjetësh.

Më parë ndalimi i funksioneve publike për ata që kryenin vepra penale ishte 5 vjet.

Kryeministri Ramush Haradinaj miratimin e kodit me ndryshime e cilësoi arritje të madhe për vendin.

Ai deklaroi se janë rritur dënimet për vepra që lidhen me korrupsionin, transmeton kallxo.com.

“Dënimet që kanë të bëjnë me korrupsion ku ka pasur mundësi janë rritur”, tha Haradinaj.

Dje në një konferencë për gazetarë edhe ministri Abelard Tahiri foli për kodin e ri.