Brazilianët vazhdojnë ta duan ish-presidentin e tyre, edhe pse u dënua për korrupsion

Dhjetëra miliona të varfër kanë përfituar nga politikat e tij të strehimit, arsimimit dhe familjes. Shumë brazilianë e mbajnë kohën e Luiz Inacio Lula da Silva-s, me një nostalgji të ngrohtë, dhe me arsye praktike, raporton Guardian, shkruan Periskopi.

Gjatë presidencës tetë vjeçare të Lula-s, prej 2003 deri më 2011, ekonomia e Brazilit u rrit shumë ndërkohë që varfëria dhe pabarazia u zbutën.

Shumë brazilianë të varfër thonë që edhe nëse Lula ka qenë i përfshirë në ndonjë akt korrupsioni, kjo ka qenë më e paktë se ajo e politikanëve të tjerë. Ata besojnë që askush nuk ka bërë më shumë për të varfrit dhe më pak për të pasurit se ai.

Lula tha që është i pafajshëm ndaj akuzave dhe se ato janë të motivuara politikisht për ta parandaluar që të garojë sërish për president të vendit.

Një shërbyese nga Recife, tha: “Kush nuk ka gabuar kurrë? Ai është i vetmi për të cilin do të votoja.”

Qeverisjet e Lulas ndërmorën një varg hapash për të rritur numrin e njerëzve nga Brazili që kishin të ardhura të pakta që të shkonin e të studionin në universitete. Programi i tij quhej “Universitet për të gjithë”.

Lula ka bërë apelim të vendimit që e dërgon në burg, por ai i është refuzuar. /Periskopi