Apeli kundërshton paraburgosjen e deputetëve të VV-së që hodhën gaz lotsjellës

Gjykata e Apelit ka refuzuar ankesën e prokurorisë në rastin e caktimit të masës së sigurisë kundër katër deputetëve të Lëvizjes Vetëvendosje, Drita Millaku, Xhelal Sveçla, Sali Zyba dhe Fitore Pacolli.

Në njoftim thuhet se Gjykata e Apelit e ka refuzuar si të pa bazuar ankesën e prokurorisë kundër aktvendimit të Gjykatës Themelore në Prishtinë, të datës 23.03.2018, sipas të cilit ishte refuzuar kërkesa e organit të ndjekës për caktimin e masës së paraburgimit ndaj të pandehurve.

Të katërtit, po dyshohen se secili veç e veç ka kryer veprat penale: “Përdorim i armës apo mjetit të rrezikshëm” dhe “Mbajtje në kontroll ose posedim të pa autorizuar të armeve”.

“Sipas vlerësimit të Gjykatës së Apelit, pretendimet ankimore të prokurorisë nuk janë të bazuara, sepse nuk janë plotësuar kushtet ligjore nga neni 187 par. 1, nën-par. 1.2, pika 1.2.1 të Kodit Penal të Republikës së Kosovës, për caktimin e masës së paraburgim, pasi që sipas shkresave të lëndës, nuk ekziston rreziku se të pandehurit do të mund të ikin apo arratisen, iu dihet identiteti dhe vendbanimi i përhershëm, të njëjtit janë deputetë në Kuvendin e Republikës së Kosovës dhe se i kanë premtuar gjykatës se do të paraqiten pranë saj sa herë që do të ftohen”, thuhet në njoftim.

Shtatë të pandehurit janë arrestuar më 21 mars në Kuvendin e Kosovës për shkak se kanë penguar rrjedhën normale të seancës, duke lëshuar gaz lotsjellës.