Talat Xhaferi shpallet qytetar nderi në Suharekë

Komuna e Suharekës, të dielën ka shpallur  “Qytetar nderi”, Kryetarin e Parlamentit të Maqedonisë Talat Xhaferin.

Kjo u bë me propozimin e Kryetarit të kësaj komune, Bali Muharremaj dhe me miratimin e Asamblesë Komunale në seancën  e fundit.

“Është nderë dhe krenari për mua që sot para jush ta shpall “Qytetar nderi” z. Talat Xhaferi. Kosova në shënimin e 10-vjetorit të Pavarësisë tregoi se është e gatshme me angazhimin e sajë për të tejkaluar të gjitha sfidat, duke mos harruar asnjë herë të kaluarën e saj të lavdishme dhe po ashtu në një proces demokratik, arriti ta njoh jetën multi etnike duke besuar se e ardhmja ndërtohet mbi themelet e respektit reciprok të mirëfilltë”, ka thënë kreu i Suharekës.

Nga ana e tij, kryeparlamentari i Maqedonisë ka vlerësuar se ky titull e bën atë më të ndërgjegjshëm në veprimtarinë e mëtejme, për faktin se mban përgjegjësi edhe ndaj qytetarëve të Suharekës.