Surroi: Rita Ora dha iluzionin se Kosova mund të jetë shtet i mirëfilltë

Në shkrimin e radhës botuar në portalin Koha, publicistja Flaka Surroi është marrë me një mori çështjesh të ndryshme që gravitojnë rreth ‘shtetndërtimit’ dhe ‘perspektivës’. Vetë ky shkrim është titulluar ‘Perspektiva e vetëcunguar’ dhe shpërndan një mori kritikash drejt liderëve të institucioneve (dhe jo vetëm) – përcjell Periskopi.

Surroi sidoqoftë u mor edhe me një episod në kuadër të festës së Dhjetë-vjetorit të Shpalljes së Pavarësisë së Kosovës: performancën e Rita Orës. Ajo tha që kjo performancë, e cila kaloi pa incidente, megjithatë krijoi iluzionin se në gjirin e popullit të Kosovës ka njerëz të aftë që në të ardhmen mund të ndërtojnë një të ardhme më të mirë.

Ajo merret veçanërisht me presidentin Thaçi dhe kryeministrin Haradinaj, dhe veprimet e tyre të fundit. Fajësia për gjendjen e keqe në Kosovë iu atribuohet këtyre dy liderëve, që sipas kësaj logjike, personifikojnë gjithë pushtetin që kosovarët e kanë zgjedhur në këto dy dekada.

Ajo e quan kastën politike ‘bar i keq’, duke u shprehur e hamendur nëse populli do t’ia dalë të gjejë formulën për ta hequr atë.