6 orë më parëProkuroria fillon hetimet për leje të falsifikuara të armëve
Periskopi(8 vite më parë)
(8 vite më parë)Në një dosje prej disa faqesh, Prokuroria e Prishtinës pretendon të ketë siguruar prova se sistemi i dhënies së lejeve të armëve ka arritur të keqpërdoret, duke u ofruar personave që nuk i plotësojnë kriteret për leje për armë zjarri. Dosja e cila ka rezultuar pas një hetimi disamujor pretendon se në të paktën pesë […]
Në një dosje prej disa faqesh, Prokuroria e Prishtinës pretendon të ketë siguruar prova se sistemi i dhënies së lejeve të armëve ka arritur të keqpërdoret, duke u ofruar personave që nuk i plotësojnë kriteret për leje për armë zjarri.
Dosja e cila ka rezultuar pas një hetimi disamujor pretendon se në të paktën pesë raste persona të lidhur me kompaninë e tregtisë dhe trajnimit për armë zjarri kanë arritur t’i pajisin me leje të falsifikuara për armë qytetarët.
Në një rast pa publicitet të madh Hashim Rexhepi, pronar i kompanisë “Fazani”, dhe djali i tij Atdhetar Rexhepi, janë arrestuar në fund të javës që po e lëmë pas.
KALLXO.com ka siguruar vendimin e Gjykatës me të cilin babë e bir janë dërguar në paraburgim prej 30 ditësh.
Aty shkruhet se Atdhetar Rexhepi në kompensim të shumave deri në 5 mijë euro i ka pajisur katër persona me leje të falsifikuara të armëve.
I njëjti dokument sqaron se Atdhetari nuk ishte nëpunës i kompanisë e cila drejtohej nga i ati, Hashim Rexhepi. Ky i fundit dyshohet se mbante të falsifikuar lejen personale.
Sipas dosjes së siguruar, Hashim Rexhepi kishte në xhepin e tij një leje për armë, e cila është e falsifikuar.
Dosja sqaron edhe pretendimet e dy të arrestuarve.
Hashim Rexhepi citohet t’i ketë thënë Gjykatës se nuk e ka ditur që leja e tij është e falsifikuar për shkak se ka ndjekur procedurat dhe ka paguar 500 euro taksë.
Ndërsa Atdhetar Rexhepi pretendon se nuk kishte gisht në këtë rast duke thënë se lejet për armë i lëshon Ministria e jo kompanitë e trajnimit dhe tregtisë së armëve.
Mbrojtësi i Hashim Rexhepit, avokati Arber Fazliu, ka konfirmuar për KALLXO.com se klienti i tij është në paraburgim prej 30 ditësh.
“Prokuroria nuk ka arritur ta provojë faktin dhe prova në bazë të mjaftueshme për caktimin e masës së paraburgimit andaj konsideroj se nuk ka arsye që ndaj të mbrojturit tim të caktohet masa e paraburgimit pasi që i mbrojturi im është i gatshëm që të bashkëpunojë me organet e ndjekjes“, ka thënë Fazliu.
Importi, shitja dhe dhënia e lejeve për armë është e rregulluar me legjislacion strikt dhe kontrollohet në vazhdimësi nga MPB.
