Politikani serb: Vrasja e Ivanoviq, interes i Rusisë

Dikush në Serbi indirekt po e pranon se Rusia mund të ketë gisht në vrasjen e Ivanoviqit. Fjala është për liderin e Lidhjes Socialdemokrate të Vojvodinës, Nenad Çanak. Ky i fundit i njohur me deklaratat e tij se Serbia duhet ta njohë Kosovën.

Çanak ka thënë se nuk e di nëse rusët e kanë vrarë Oliver Ivanoviqin. Por sipas tij, vrasja e politikanit serb, më së shumti i shkoi përshtati shtetit të Rusisë.

“Nuk kam thënë kurrë që rusët e vranë Ivanoviqin, por po e them përsëri se interesat e Rusisë në këto momente janë shumë të afërta që të sjellin një paqëndrueshmëri me vrasje të tilla politike. Arsyeja është e thjetë: Me një Ballkan të paqëndrueshëm, rusët shfaqen si zjarrfikës. Zjarrfikësit nuk kanë punë pa zjarr”, ka thënë Çanak për Evropën e Lirë.

“Mendoj se do të kemi më shumë shqetësime në veri të Kosovës, që do të shkojnë krah për krah me administratën e Putinit, sepse kjo do të çojë në forcimin e forcave pro-serbe ekstremiste në Serbi”, thotë lideri i Lidhjes Socialdemokrate të Vojvodinës.

Ai ka thënë tutje se përplasje të tilla mund të ketë edhe në Serbi pas zgjedhje të muajit mars.

“Shpërthimi i përplasjeve të tilla mund të ndodhë edhe në Beograd pas zgjedhje të marist. Jam i përgatitur që këto informata t’ua dërgoj edhe autoriteteve serbe”, ka thënë tutje ai për Radion Evropa e Lirë në Serbi.

Çanak përsëriti se qendra humanitare ruse në Nish, është një bazë ushtarake e Putinit.

“Qendra në Nish është një nga dëshmitë më serioze të politikës ekspansioniste të Rusisë”, thotë Çanak.

Ndryshe Çanak njihet nga kritikuesit më të mëdhenj të politikës nacionaliste serbe.