Nivel i lartë korrupsioni në shëndetësi dhe arsim

Ky është konkluzioni i tryezës së radhës të organizuar nga Oda Ekonomike Amerikane në Kosovë.

Arian Zeka, Drejtor Ekzekutiv i Odës Amerikane, tha se tryeza ndodh në një kohë pas publikimit të raportit të organizatës Transparency International e cila vlerëson progresin e ndjeshëm të Kosovës në aspekt të perceptimit të korrupsionit, duke e ranguar atë në 10 vende më mirë krahasuar me vitin e kaluar. Megjithatë, pavarësisht përparimit, ai tha se duhen shtuar përpjekjet në të gjitha hallkat e luftimit të korrupsionit për rezultate më të efektshme në këtë aspekt.

Në lidhje me korrupsionin në shëndetësi, Patrick Etienne nga Zyra Zvicrane për Zhvillim dhe Bashkëpunim në Kosovë, tha se pasojat e këtij fenomeni janë tragjike për arsye se ato ndikojnë në shërbime të cilësisë më të ulët, dhe rrjedhimisht në presion dhe stres në shoqëri, që po rezulton që qytetarët të dalin jashtë shtetit. Ai tha se problemi kryesor qëndron tek institucionet e larta shtetërore tek të cilat interesi privat mbizotëron atë publik.

Blerim Syla, Kryetar i Federatës Sindikale të Shëndetësisë, tha se korrupsioni është edhe i natyrës individuale, por edhe institucionale, duke përmendur kështu nivelin e lartë në politikë. Ai tha se mungon vetëdijësimi i shoqërisë civile në raportimin e korrupsionit, duke theksuar rëndësinë e një angazhimi më të madh edhe të medieve. Ai tha se pavarësisht shqetësimeve të ngritura në këtë aspekt, reagimi i institucioneve nuk ka qenë i duhuri.

Në anën tjetër, duke folur në panelin mbi korrupsionin në arsim, Arbër Geci, zëvendësministër i Ministrisë së Arsimit, Shkencës dhe Teknologjisë tha se në krahasim me shëndetësinë, pasojat e korrupsionit në arsim janë më të ngadalshme.

Dukagjin Pupovci, Drejtor i Qendrës për Arsim të Kosovës, tha se sistemi korruptiv në punësimin e personelit arsimor mbetet shqetësues, si në nivelet komunale ashtu edhe ato ministrore. Ai po ashtu përmendi korrupsionin në paga në institucionet e larta arsimore, duke theksuar se nxjerrja e paralajmëruar e ligjit mbi pagat do të ndihmonte në eliminimin e disa prej problemeve.