Haxhiu: Politikanët që falin tokë për karrige, duhet t’i pensionojmë politikisht

Sot një konferencë para medieve, kryeministri Ramush Haradinaj paralajmëroi ditën e pasnesërme si të fundit për ta sjell në Kuvend marrëveshjen për demarkacionin, bashkë me aneks-marrëveshjen e arritur së fundmi mes Kosovës e Malit të Zi në nivel presidentësh.

Haradinaj ka mbrojtur qëndrimin e tij, se me këtë marrëveshje Kosova fiton të drejtën e saj në territor, duke thënë se kësaj çështjeje duhet t’i jepet fund, shkruan Periskopi.

Por, deputetë të Vetëvendosjes, me të cilët Haradinaj e kishte kundërshtuar fuqishëm këtë marrëveshje, nuk pajtohen me të.

Në një prononcim për Periskopin, Albulena Haxhiu ka thënë se marrëveshja e re mes presidentëve, atij kosovar dhe malazez, është mashtrim i radhës dhe sipas saj, nuk është më shumë veçse konfirmim i marrëveshjes aktuale që Malit të Zi i falë 8200 hektarë tokë.

“Qëndrimi ynë në raport me marrëveshjen aktuale është i qartë. Ne nuk do të përkrahim këtë version të marrëveshjes dhe do ta kundërshtojmë kurdo që do të radhitet në rend dite. Edhe në mbledhjen e kryesisë së Kuvendit, por edhe në paraqitjet tona publike ne u kemi bërë thirrje që t’i thërrasin mendjes dhe të tërhiqen nga versioni aktual. Deklarata ndërmjet dy presidentëve është mashtrim i radhës dhe në fakt konfirmim i marrëveshjes aktuale që i falë mbi 8200 ha, Malit të Zi”, tha Haxhiu për Periskopin.

Haxhiu, ka folur edhe për ndryshimin e qëndrimeve të kryeministrit Haradinaj. Sipas saj, kauza e Haradinajt për demarkacionin ka qenë vetëm një mënyrë për të arritur ardhjen në pushtet.

“Ndryshimi i qëndrimeve nga z.Haradinaj është për keqardhje e dëshpëruese dhe tregon atë që z.Haradinaj nuk e paska pasur kundërshtimin e demarkacionit kauzë por e paska kundërshtuar sa për të mbërri deri tek karrigia e kryeministrit. Historia kur pushtetarët kanë dhënë territor për karrige, për fatin tonë të keq ka tendencë të përsëritet sërish. Këta njerëz që janë në gjendje të bëjnë pazare me cenimin e integritetit territorial, është koha t’i pensionojmë politikisht”, theksoi Haxhiu.

Në fund, Haxhiu tha se Vetëvendosje është e interesuar t’i jap fund zgjidhjes së demarkacionit, e po ashtu edhe të mbajë raporte të mira fqinjësore me Malin e Zi – porse kjo gjë s’duhet të bëhet në kurriz të qytetarëve. /Periskopi/