Haradinaj nuk heq dorë nga raporti i Bulliqit për demarkacionin

Seancë dështoi të mbahej pasi nuk kishte marrëveshje ndërmjet partive që të votohej demarkacioni.

Nga postimi që bëri sonte Haradinaj në Facebook, ai përmend edhe raportin e kryetarit të komisionit, Shpejtim Bulliqi.

Kujtojmë që LDK është deklaruar se nuk do ta votojë demarkacionin, nëse marrëveshjes i bashkëngjitet edhe ky raport.

Sonte partitë politike kanë mbajtur edhe një takim, ku janë bërë përpjekje për të arritur konsensus. LDK ka thënë se kanë ofruar zgjidhjen për votimin e marrëveshjes, pa treguar se për çka bëhet fjalë.

Më poshtë mund ta lexoni postimin e tij të plotë:

Të dashur qytetarë!

Në seancën e sotme të Kuvendit të Kosovës, kjo ishte fjala ime e planifikuar:

Të nderuar deputet në emër të Qeverisë së Republikës së Kosovës ju paraqes Projektligjin për ratifikimin e Marrëveshjen për Kufirin Shtetëror në mes të Republikës së Kosovës dhe Malit të Zi, të nënshkruar në Vjenë me datë 26 gusht 2015.

Ky Ligj ka 4 nene dhe poashtu përmbanë:

Dokumentacionin zyrtar i Komisionit Shtetëror për shënimin e Kufirit Shtetëror në mes të Republikës së Kosovës dhe Malit të Zi dhe,

Deklaratën e përbashkët e Presidentit të Republikës së Kosovës, Sh.T.Z. Hashim Thaçi dhe Presidentit të Malit të Zi, Sh.T.Z. Filip Vujanoviq e datës 16.02.2018

Të nderuar deputetë, ju ftoj që ta votoni këtë Projektligj, sepse Kosova

– Zbaton të drejtën në territor dhe integritetit

– Zbaton të drejtën për liri të lëvizjes dhe i jep fund izolimit duke përfituar Liberalizimin e Vizave nga Bashkimi Europian

Ju faleminderit.

Mbetem me shpresë, që këtë adresim ta bëjë në seancën e nesërme!