I ftohti siberian në Ballkan ngrin detin

Temperatura më e ulët në mëngjes në Kroaci është matur në Zavizhdan, minus 21 gradë Celsius, ndërsa në Gorski Kotar, ka rënë tre metra dëborë, njoftuan mediat kroate.

Mjekët i këshillojnë kroatët se si të mbijetojnë në këto ditë të ftohta, duke përfshirë edhe atë se cili ushqim është më i mirë të konsumohet.

Siç njoftoi paraprakisht MIA, nën ndikim të të ftohtit siberian që nga lindja po zgjerohet drejt Gadishullit Ballkanik, i gjithë rajoni është përfshirë nga temperatura të ulëta dhe reshje të dëborës, të  cilat kanë rënë madje edhe në pjesë të bregdetit të Adriatikut.

Sipas Entit hidrometeorologjik malazez, më shumë dëborë në Mal të Zi ka rënë në Zhablak ku është formuar mbulesë dëbore nga 97 centimetra, ndërsa dëborë ka në Podgoricë, Cetinjë, Kollshin, Shavnik, Rozhaje, Andrijavica, Bijello Pole dhe Plevla.

Reshje bore ka pasur edhe në portin malazez Tivar.

Drejtoria për gjendje të jashtëzakonshme pranë Ministrisë malazeze të Punëve të Brendshme u bëri thirrje të gjithë institucioneve që të rrisin shkallën e gatishmërisë para vrullit të valës së të ftohtit.

Pjesa më e madhe e Bosnjes gjithashtu është mbuluar me dëborë, ndërsa në Bjellashnicë lartësia ka arritur në 183 cm.

Në këtë rajon është matur edhe temperatura më e ulët minus 16 gradë Celsius, në Han Pjesak minus 11, në Tuzla minus gjashtë, Banjalukë dhe Sarajevë minus pesë, ndërsa në Mostar një gradë mbi zero.

Dëborë nga dje po bie edhe në gjithë Serbinë, ku gjithashtu janë matur temperatura nën zero.