U miratua draft-amendamenti për emrin e Maqedonisë së Veriut

Me 67 vota për, 23 kundër dhe 4 të përmbajtur Kuvendi maqedonas miratoi tekstin e draft-amandamentit i cili parashikon ndryshimin e emrit Kushtetues të vendit nga “Republika e Maqedonisë” në “Republika e Maqedonisë së Veriut”.

Ashtu siç kishin paralajmëruar deputetët e përjashtuar nga VMRO-ja, këta votuan “të përmbajtur”. Deputetja e VMRO-DPMNE-së, Dafina Stojanovska, adresoi akuza të rënda ndaj Qeverisë mbi ndryshimet Kushtetuese në lidhje me emrin zyrtar të shtetit, pas marrëveshjes historike të arritur me Greqinë.

“Kjo Qeveri nënshkroi dhe u pajtua që ne të kemi formulim të ri, emërtim të ri dhe formim të ri si popull. Popull pa histori. Ja, kjo është ajo që fshihet pas ndryshimeve Kushtetuese, dhe pas kësaj marrëveshjeje të turpshme. Amandamenti 33 do ta fshijë luftën e maqedonasve për shtetin e tyre sepse po shkruani histori të re. Nuk ka histori të re, historia është vazhdimsi ajo është e shkruar dhe shkruhet. Ndërsa ju në të do të jemi turpi më i madh i Maqedonisë”, tha Stojanovska.

Ndryshe, Maqedonia dhe Greqia arritën marrëveshje për emrin më 15 qershor të këtij viti duke përmbylur kështu një kontest disa dekadësh.