Lirohet gazetarja e KTV-së pas 6 orësh

Gati gjashtë orë pasi i është marrë paligjshëm telefoni personal, njëherësh mjet i punës së përditshme, dhe disa orë pasi është mbajtur në stacion policor, është liruar gazetarja e Kohës Ditore, Saranda Ramaj.

Asaj i është marrë telefoni nga njësiti policor për mbrojtje të afërt i presidentit Thaçi, në seancë gjyqësore, derisa atje kishte shkuar për të përcjellë gjykimin në rastin “Syri i Popullit”.

Lexo edhe: Koci: Ramajt iu mor telefoni kundërligjshëm, s’kemi të bëjmë me konfiskim

Kur dëshminë e tij po e jepte kreu i shtetit, Hashim Thaçi, me kërkesë të tij, gjyqtarja gojarisht ka kërkuar që dëshmitë të mos incizohen. Për të raportuar në mënyrë sa më të drejtë dhe duke mos pas vendim të shkruar për një gjë të tillë, Ramaj ka vazhduar incizimin.

Policia ia ka marrë mjetin e saj personal dhe e ka mbajtur larg saj, gjithë këto orë, pa vendim të Gjykatës.

Njohësit e fushës së drejtësisë dhe të medieve në Kosovë e kanë cilësuar këtë si akt të rrezikshëm që rrëshqet drejt diktaturës, dhunim i gjithsecilit qytetar, e shkelje flagrante e neneve 4, 5 dhe 6 e Ligjit për Mbrojtjen e Burimeve të Gazetarisë dhe nenit 10 të Konventës Europiane për të Drejtat e Njeriut.