Limaj u premton projekte për punësim të rinjëve në Drenas

Krzetari i Nismës për Kosovën, Fatmir Limaj, ka premtuar mbështetje për të rinjtë që kanë projekte për vetëpunësim.

Zëvendëskryeministri i Kosovës, njëherësh kryetar i Nismës Socialdemokrate, Fatmir Limaj ka takuar në Komoran të të rinjtë e Drenasit dhe Skenderajt, të cilëve iu bëri thirrje që të punojnë për ndërtimin e Kosovës, e mos të largohen nga vendi.

Limaj tha se ëndrra e rinisë kosovare paraluftës ka qenë liria, kurse porositi se ëndrra e të rinjve të Kosovës tani duhet të jetë e përbashkët, “ndërtimi i Kosovës”.

“Rinia e Kosovës nuk ka një ëndërr të përbashkët. Çfarë ëndrre ka sot i riu i Kosovës? Individuale, ia kthen shpinën sfidës, heq dorë lehtë nga shteti, heq dorë menjëherë prej shtetit, që me qindra e qindra vite prindërit, stërgjyshërit e baballarët tanë kanë sakrifikuar. Për 10 vjet shtet presim që shteti t’i rregullojë të gjitha punët”, ka thënë Limaj. Tutje, Limaj shtoi se jo domosdoshmërish të rinjtë duhet të kryejnë një fakultet për të pasur një punë dhe u bëri thirrje të rinjve që të orientohen kah shkollat profesionale.”Djem e vajza, të cilëve nuk iu shkon shkolla, nëse nuk jeni në profesionet që besoni se nuk jeni për to, çohuni e merreni ndonjë zanat. Ne kemi ardhë sot me iu thënë Drenasit, Skenderajt edhe të rinjve të Kosovës, bashkohuni, mësojeni ndonjë zanat, ne ju mbështesim”, ka thënë Limaj, transmeton KP.