AGK: Mediat në Kosovë s vuajnë nga ndërhyrja e drejtpërdrejtë dhe indirekte politike

Asociacioni i Gazetarëve të Kosovës ka vlerësuar të dhënat e publikuara nga “Reporterët pa kufij” në lidhje me gjendjen e mediave në Kosovë.

AGK konsideron se ky raport pasqyron gjendjen reale në vend ndërsa  shpreh shqetësim për vështirësitë më të cilat përballen gazetarët kosovarë  gjatë ushtrimit të profesionit të tyre.

Organizata prestigjioze e gazetarëve thekson se mediet e Kosovës vuajnë nga ndërhyrja e drejtpërdrejtë dhe indirekte politike, presioni financiar dhe pronësia e përqendruar.

“Gazetarët që kritikojnë autoritetet kosovare shpesh akuzohen se janë “tradhtarë” ose “simpatizantë të Serbisë”.  Pak ditë pasi qeveria e tij e koalicionit u konfirmua, në shtator 2017, kryeministri Ramush Haradinaj i përshkroi gazetarët si “analfabetë” dhe i këshilloi ata që të “ktheheshin në shkollë. “Dy gazetarë hulumtues u sulmuan fizikisht pasi në artikujt e tyre kritikuan anëtarët e qeverisë dhe aleatët e ngushtë.” , thuhet në raportin e  “Reporterët pa Kufij” , ku megjithatë  Kosova ka shënuar një përparim të lehtë në indeksin botëror të lirisë së shtypit krahasuar me vitin e kaluar.

Në barometrin e lirisë së shtypit, sivjet,  Kosova është rankuar në pozitën e 78-të ose për katër pozita më lartë se në vitin 2017 ku renditej në vendin e 82-të.

Organizata botërore e gazetarëve thekson se  qeveria aktuale duket më e gatshme të flasë me gazetarët dhe mediat në tërësi, ndryshe nga dy qeveritë e mëparshme, të cilat ishin shumë më pak të hapura për dialog.

Asociacioni i Gazetarëve të Kosovës kërkon nga institucionet qendrore që t`i marrin në konsideratë të gjeturat e këtij raporti dhe të angazhohen për krijimin e një mjedisi më të sigurt të të bërit gazetari dhe një ambienti jo armiqësor me gazetarët.