Zeka reagon ndaj Konjufcës: Do të të padis edhe unë ty, krejt Kosova e di që jeni abuzues seksual

Të njëjtat akuzave përveç emisionit “Dossier D”  të RTV Dukagjinit, Milaim Zeka i ka përsëritur edhe dje në një intervistë dhënë Periskopit.

Lidhur me padinë e deputetit Glauk Konjufca, Zeka sot tha për Periskopin se akuzat e tij janë të bazuara në fakt.

Sipas tij, akuzat e Konjufcës ndaj tij për mashtrim dhe hajni, përveç në Kuvend, dhënë edhe në televizion, janë të pabaza.

Madje, edhe ai paralajmëroi padi ndaj Konjufcës për dëmtim imazhi lidhur me ato akuza.

“Le t’i qet faktet që i ka ai. Nuk po akuzoj në hava unë. I kam incizimet që kanë marrë pare për vota në Prizren edhe incizimi që për leje në Prishtinë i kanë marrë 350 mijë euro. Hajde ballafaqohemi, e i ballafaqojmë faktet.  Ata janë abuzues seksual, këta e dinë krejt Kosova. Kanë qenë nëpër krejt mediet këto skandalet seksuale që kanë ndodh në zyret e tyre. Krejt çka duan ata është që ta shkatërrojnë Kosovën. Ai nuk e ka asnjë dëshmi të vetme kur më akuzu mu si mashtrues e hajn, sepse në asnjërën nga dëshmitë në Prokurori nuk është përmendur emri im”, ka thënë Zeka për Periskopin.

Në anën tjetër, në padinë e dorëzuar në Gjykatën Themelore të Prishtinës, deputeti Glauk Konjufca ka kërkuar dëmshpërblim prej 50 mijë eurosh.

“Pretendimet e të paditurit përmes kësaj interviste i përmbushin të gjitha elementet e veprës së shpifjes dhe fyerjes ndaj të paditurit, bazuar në faktin se deklarata nuk është e vërtetë dhe është tejet nënçmuese duke përfshirë edhe dëmtimin e rëndë të reputacionit të z.Glauk Konjufca. Përveç kësaj i padituri ka qenë në dijeni se deklarata e tillë është e pavërtetë dhe e pasaktë, por e ka bërë atë me qëllim të dëmtimit dhe zhvlerësimit të reputacionit si dhe cenimit të imazhit publik të paditësit”, thuhet në padi.

Në padi thuhet se Zeka në mënyrë flagrante ka shkelë ligji kundër Shpifjes dhe Fyerjes pasi me deklaratat e tij e ka dëmtuar jashtëzakonisht shumë reputacionin e Konjufcës në raport me publikun.

“Paditësi konsideron se për shkak të përjetimit të dhimbjes shpirtërore, denigrimit të personalitetit dhe cenimit të dinjitetit, lartësia e dëmit të shkaktuar jomaterial do të duhet të kompensohet në të holla në  detyrim të ligjit për Marrëdhëniet e Detyrimeve dhe për këtë i njëjti i propozon Gjykatës që konpenzimi të bëhet në emër të këtij dëmi dhe atë në shumë prej 50 mijë euro”, thuhet në padinë që publikoi portali Insajderi./PERISKOPI