Ishte bashkë me ta në debat, por deputeti i PDK-së, Hajdar Beqa, nuk po di asgjë rreth rrahjes së dy kolegëve të tij, Xhelal Sveçlës dhe Frashër Krasniqit. Madje, ai thotë se nuk e di as nëse vërtet ata janë përleshur dhe se këtë e ka mësuar vetëm nëpër portale.

Beqa ka thënë se nuk ka asnjë informacion nëse janë përleshur dy deputetët ose për arsyen rreth kësaj përleshjeje. Derisa, ka shtuar se debati i mbrëmshëm ka shkuar shumë mirë dhe se nuk ka pasur ndonjë situatë të tensionuar.

“Unë në media e kam pa, edhe nuk mundem me thanë kurgjë se nuk kam qenë aty. Nuk e di as a janë përleshë përnime. Ma mirë kish me qenë me i kontaktu vetë ata”, ka thënë Beqa për Express.

E se Krasniqi dhe Sveçla janë përplasur fizikisht mbrëmë, këtë e ka konfirmuar deputetja e LDK-së, Besa Gaxherri, e cila kishte qenë në debat me ta.

Gaxherri ka thënë se ajo ka qenë dëshmitare e këtij incidenti dhe se autori i emisionit, Adriatik Kelmendi është marrë me dy deputetët duke tentuar t’i ndajë.

“Po janë përleshë mes vete. Fatkeqësisht ka ndodhë. Unë kam qenë dëshmitare por nuk e di qysh ja kanë nisë vetëm kur i pashë, vërtetë eskaloi situata. Adriatiku, më shumë u mor me ta”, ka thënë Gaxherri.

Për këtë rast kishte folur mbrëmë edhe vetë Sveçla. Por, ai kishte mohuar se ka pasur përleshje, derisa kishte thënë se vetëm janë fjalosur. Ndërsa, sot ai nuk u është përgjigjur telefonatave.

Ndërsa, deputeti Krasniqi nuk është deklaruar deri më tani për këtë incident.

Ndërkohë, sipas mediave, modeli i flokëve të Xhelal Sveçlës duket se ka qenë arsyeja e rrahjes së mbrëmshme mes tij dhe Frashër Krasniqit.

“Frashër Krasniqi i ka thënë Xhelalit frizura po të rri mirë. Pas këtyre fjalëve ka reaguar Xhelali duke e ofenduar dhe sharë Krasniqin. Dhe këtu ka nisur përleshja”, raportohet në media.

Ndryshe, deputeti Krasniqi e kishte grushtuar më herët në studio televizive edhe deputetin e Nismës Socialdemokrate, Milaim Zeka.