Kosova e Serbia e shohin fitore mënyrën e raportimit për Kosovën në OKB

Por pikërisht rikthimin e diskutimit për Kosovën në OKB, me iniciativë të Kinës që e fut në rend dite këtë raportim, Serbia po e sheh si fitore. Shefi i diplomacisë serbe Ivica Duçiq e ka falënderuar në mënyrë të posaçme Kinën, por edhe Rusinë që kanë kontribuar që Kosova të jetë përsëri në agjendën e OKB-së.

Përmes një postimi në rrjetin social Facebook, Teuta Sahatqija, ka konfirmuar lajmin se Këshilli i Sigurimit të Kombeve të Bashkuara, nën kryesimin e Kinës e futë përsëri Raportimin e UNMIK-ut në rend dite.

“Seanca e radhës do të mbahet më 14 nëntor në mëngjes. Ajo që është me rëndësi është se për herë të parë u thye rregulli 3 mujor i raportimit dhe tashmë kaluan 6 muaj nga raportimi i fundit në maj. Britania e para e bëri këtë hap në gusht të cilin e vazhdoi SHBA-ja në shtator dhe Bolivia në tetor, të cilët nuk e futën në rend dite gjatë kryesimeve respektive”, ka shkruar Sahatqija, përcjell Koha.net. “Ambasadorja e SHBA-së në KB, Nikki Haley, i shkroi letër Sekretarit të Përgjithshëm, Guteres, për nevojën e ndryshimit të qasjes dhe rishikimit strategjik të këtij misioni anakronik. Kjo qasje është prezente që shumë kohë te anëtarët e KS të KB të cilat kërkojnë një rishikim strategjik të misionit”, ka shtuar më tej ajo.

Sipas Sahatqisë, pikërisht ndryshimi i frekuences nga 3 në 6 muaj është fitore dhe mesazh për vazhdim në këtë mënyrë.

“Për këtë falënderojmë Britaninë, SHBA-në dhe shtetet mike për punë e përkushtim të vazhdueshëm deri në arritjen e kësaj fitoreje dhe për mbështetjen e vazhdueshme. Ndryshime tjera pritet të vijnë me kohë sikur ulja e prezencës, buxhetit, frekuenca dhe mënyra e raportimit deri në ndryshimin e misionit të UNMIK-ut nga mision ‘paqeruajtës’ dhe ‘administrues’ në mision politik të KB”, ka thënë Sahatqija.

Kumtin se sesioni i parë i ardhshëm, në të cilin do të diskutohet një raport mbi situatën në Kosovë është planifikuar për 14 nëntor, e dha sot edhe ministri i Punëve të Jashtme i Serbisë, Ivica Daçiq.

“Programi i punës së KS të OKB-së për nëntor u miratua, ku seanca mbi Kosovën u kthye përsëri në agjendë dhe u caktua për 14 nëntor”, tha Daçiq për Tanjug.

Ai shpjegoi se disa vende kërkuan që Kosova të mos jetë në agjendën e Këshillit të Sigurimit të OKB-së, por nuk kërkuan votim për të, por vendimin ia lanë kryesuesit.

“Dua të falënderoj Kinën për mbështetjen jashtëzakonisht të rëndësishme që Kosova do të jetë përsëri në agjendën e OKB-së, si dhe Rusinë dhe anëtarët e tjerë të OKB-së që e mbështesin propozimin”, tha Daçiq.

Siç mëson agjencia e lajmeve serbe Beta, e transmeton KSP, më 14 nëntor, do të shqyrtohet raporti i Sekretarit të Përgjithshëm të OKB-së, Antony Guterres, mbi punën e UNMIK-ut.

Në shtator, Këshilli i Sigurimit u kryesua nga Shtetet e Bashkuara, i cili gjithashtu ndryshoi formatin, ndërsa në tetor u kryesia nga Bolivia. Nga sot Presidenca e Këshillit të Sigurimit të OKB-së është marrë nga Kina.