I riu nga Prishtina për pak sa nuk humbi jetën për një biletë

Dhe ashtu si çdo simpatizant në botë i lojës së futbollit, edhe të rinjtë kosovarë mezi presin të jenë prezent në stadium kur kombëtarja e Kosovës luan në ndonjë nga stadiumet e Kosovës.

Një nga këta të rinjë është edhe i riu nga Prishtina, Latif Beqiri, i cili mezi po priste ditën kur do të mund të jetë duke e shikuar kombëtaren e shtetit të tij teksa luan me kombëtaren e Maltës në stadiumin Fadil Vokrri në Prishtinë.

Kështu, që të mund të jetë prezent në stadium, ai, si shumë të tjerë, kishte pritur në radhë që të mund të blejë një biletë që t’i mundësohet hyrja në stadium për lojën që do të luhej pak ditë më vonë.

Por, për shkak të asaj që  i ndodhi atë ditë Latifit dhe pasojat e saj një ditë më pas, mendojmë se ngjarja meriton vëmendjen tonë.

Gjatë asaj dite, teksa Latifi, bashkë me shumë të tjerë, po priste në radhë që të mund të blente biletën, për shkak të një tollovie të krijuar nga disa persona problematikë dhe, guxoj të them, të papërgjegjshëm, pjesëtarë të Policisë së Kosovës kishin arritur në vend dhe, në përpjekje për të vënë rend, e kishin ndjerë të nevojshme të përdorin edhe sprejin, një mjet për të zmbprapsur ose qetësuar turmën.

Nga spreji e kishte pësuar edhe Latifi, edhe pse ky i fundit nuk ishte fare pjesë e shkaktimit të tollovisë dhe po priste qetësisht në radhë për biletë.

Mirëpo, ndaras nga shkaktimi i irritimit të syve që shkakton lotim, përmbajtja e substancës së sprejit, mesa dimë, nuk supozohet të ketë efekte anësore të mëpastajme që mund edhe t’ia sjellin vdekjen personit.

Dhe prap vdekja është ajo me çka Latifi u ballafaqua: Vetëm një ditë më pas, pasi Latifi kishte shkuar në punë, papritmas atij kishte filluar t’i keqësohej gjendja. Latifit kishte filluar t’i errësohej të pamurit, të ketë kokëdhimbje të forta dhe të rrahurat e zemrës kishin filluar t’i shpeshtoheshin më shumë se normalja.

Ndërhyrja e mjekëve e shpëtoi atë. Por, Latifi thotë se po të ndërhynin mjekët më vonë, ai nuk do të mund të shpëtonte. Ndërsa, ajo çfarë njëra nga mjeket i tha Latifit për shkakun e keqësimit të gjendjes së tij, bën që të ngriten pyetje në lidhje me substancën e sprejit që mban Policia e Kosovës.

Mjekja i kishtë thënë Latifit se shkaku i keqësimit të gjendjes së tij ishte pikërisht spreji që atij i ishte hedhur në sy nga Policia vetëm një ditë më parë.

Kjo, sikur pashmangshmërisht ngre pyetje për përmbajtjen e substancës së sprejit; nëse, përshembull, është pa afat ose madje nëse ka ndonjë përmbajtje tjetër që rrezikon jetën e personit. Pyetje të tilla janë të nevojshme, sidomos kur kihet parasysh që spreji është mjet që Policia mund ta përdorë edhe në të ardhmen në persona të tjerë.

Duke thënë këtë, një pyetje e tillë u ngrit duke u bazuar në konstatimin e një mjekeje. Përndryshe, ne, në asnjë mënyrë, nuk po mundohemi të konstatojmë se gjithsesi spreji ka qenë shkaku i keqësimit të gjendjes së Latifit; nuk mund të përjashtojmë mundësinë që mund të ketë pasur shkaqe të tjera në lojë.

Por, në anën tjetër, është diçka për të cilën ia vlen të flitet, duke qenë se konstatimi është bërë nga një mjeke dhe me qëllim që ky rast të shërbejë që Policia të kontrollojë për përmbajtjen ose të shikojë çfarë spreji ka në dispozicion. Nuk i kushton asgjë.