Avokati i Popullit flet për Periskopin, tregon kur do ta vizitojë në burg Sylejman Selimin

Jashari ka thënë për Periskopin se Institucioni që ai drejton ka vizituar në burg Selimin edhe herave tjera, pa pasur fare thirrje nga deputetët.

“Ne e kemi vizituar edhe më herët, pa ndonjë thirrje, Sylejman Selimin dhe të tjerët. Është vizituar në dhjetor, pastaj në mars të këtij viti dhe ka qenë në plan të vizitohet javët që po vinë”, ka thënë Jashari për Periskopi.

Tutje, ai ka bërë të ditur se herët e kaluara kur kanë qenë në vizitë, kanë intervistuar Selimin dhe anëtarët e tjerë të grupit lidhur me kushtet dhe trajtimin në burg në përgjithësi, për çka thotë se nuk ka pasur ankesa më parë.

“Me shqetësues ndoshta ka qenë vendimi i fundit i Gjykatës Supreme. Por, ai nuk është ankuar për kushtet apo trajtimin në burg. Ne ende nuk e kemi trajtuar në tërësi aspektin ligjor të lëndës së Sylejman Selimit, por nuk ka pasur ndonjë pretendim për procedurën gjyqësore. Në vendime neve nuk na lejohet me ndërhy”, shtoi ai.

Jashari foli edhe për vendimin e fundit të Selimit, që të mos ketë fare avokat në procesin ndaj tij.

“Nuk mundem me vlerësu sa mundet me dëmtu procesin ndaj tij fakti që ai ka kërkuar të mos ketë avokat, por mendoj se nuk mund të zhvillohet një proces korrekt dhe i drejtë, që përkon me standardet ndërkombëtare. Nuk kemi autorizim me vlerësu zhgënjimin që mund të ketë ai ndaj gjithë procesit, por ne vlerësojmë procesin në bazë të respektimin të procedurave të garantuara me Kushtetutë”, ka thënë Jashari tutje për Periskopin.

Në anën tjetër, dje në Kuvendin e Kosovës, deputeti i AAK’së, Daut Haradinaj i ka bërë thirrje Institucionit të Avokatit të Popullit që ta vizitojë në burg Sylejman Selimin, për të parë kushtet dhe trajtimin që po i bëhet atij atje.

Në anën tjetër, reagim pati edhe nga avokati i Selimit, Tomë Gashi, i cili kishte thënë se nuk po arrin të kuptoj se si është e mundur që Selimi të mbahet në burg pa një vendim gjyqësor.

Ish –Komandanti i UÇK’së Sylejman Selimi përmes një letre kishte reaguar ndaj vendimit të fundit të Gjykatës Supreme e cila e refuzoi kërkesën e tij për lirim me kusht. Në letrën e tij, drejtuar avokatit Tomë Gashi, Selimi bënë me dije se ka marrë vendim që tash e tutje të mos ketë përfaqësim ligjor pasi siç thotë ai procesi kundër tij është i montuar nga politikanët vendës dhe ndërkombëtarë.

Në letrën e shkruar me dorë, Selimi thotë se padrejtësinë ndaj tij do t’i dëshmojë koha dhe se ata që kanë marrë pjesë “në këtë montim politik duke ndërhyrë në drejtësi një ditë kanë me u turpëru para familjeve të tyre dhe para qytetarëve të këtij vendi. Koha do të dëshmojë”./PERISKOPI