Zbulohet se si ministri i dorëhequr grek bleu mediat shqiptare

Ministri i dorëhequr i Greqisë Niko Kotzias dyshohet se ka financuar me fondet sekrete portale, media dhe gazetarë në Shqipëri dhe në Maqedoni.Më 10 tetor u publikuan informacione që tregonin se në  ministrinë e Jashtme ishin bërë shpenzimet sekrete.

Sipas një njoftimi për shtyp, zarfi i mbyllur i transferuar nga diplomati i Ministrisë së Jashtme dhe i hapur në zyrën e Dhomës së Përfaqësuesve përmbante tre kode me një shumë totale prej 1 milion eurosh.

Të njëjtat burime raportojnë se kodi i parë lidhet me paratë e kanalizuara për mediet në Shqipëri, financimi i dytë për mediet e Shkupit dhe paratë e tjera ishin të kanalizuara për të mbështetur kishat ortodokse dhe fenë ortodokse në përgjithësi.

Paratë për mediet në Shqipëri dhe Maqedoni u dhanë me qëllim që të publikoheshin lajme pozitive për Greqinë dhe për të lobuar me gazetarët ose krerët e medieve në dobi të interesave grekë. Megjithatë, nënkryetarët e Dhomës së Përfaqësuesve që morën pjesë në hapjen e “zarfit” theksojnë se gjithçka është jashtëzakonisht formale, pasi informacioni i dhënë është i përgjithshëm.

CNN grek raporton se është kryer një hetim paraprak në lidhje me rrjedhjen e informacionit se si Ministria e Punëve të Jashtme siguroi fonde sekrete.  Hetimi i është besuar Sigurisë Shtetërore për të konstatuar kryerjen e mundshme të akteve të prokurorisë.

Urdhri u dha pas botimit në shtypin elektronik të informacionit se zarfi i vulosur mbahej  nga zyrtari diplomatik i Ministrisë së Punëve të Jashtme, ai u hap në zyrën e kryetarit të Parlamentit.