Shënohet Dita Botërore e ‘Spina Bifida’, nuk dihet numri i të sëmuarve në Kosovë

Me rastin e Ditës Botërore të Spina Bifida, e njohur si anomalia e boshtit kurrizor, sot u mbajt një aktivitet sensibilizues në Prishtinë, ku janë shpërndarë fletëpalosje për qytetarët në mënyrë që ata të vetëdijesohen për këtë sëmundje.

Valbona Stavileci, nefrologe në Qendrën Klinike Universitare të Kosovës ka thënë se qëllimi është që populli të jetë i vetëdijshëm se ekzistojnë mjekë të trajnuar dhe të aftë për ti menaxhuar këto raste.

Apel të veçantë, ajo ka pasur për të gjithë ata që ecin e janë në gjendje të mirë, por kanë Spina Bifida, që të lajmërohen në kontroll.

“Qëllimi është të vetëdijesohen se edhe në qoftë se një pacient e ka Spina Bifida edhe ecë duhet të lajmërohet për kontroll se veshkat dhe fshikëzën urinare janë shumë të dëmtuara prej Spina Bifida dhe këta janë njerëz në rrezik nëse nuk lajmërohen menjëherë pas lindjes për trajtim”, theksoi Stavileci.

Po ashtu, neonatologja, Mirlinda Shala, Spina Bifidën e ka cilësuar si shumë komplekse, që paraqet shumë problem për familjarët, por edhe shoqërinë.

Ajo ka kërkuar që të ketë më shumë përkrahje prej institucioneve dhe organizatave joqeveritare, që t’iu dalin në ndihmë fëmijëve me këtë problem.

“Pikërisht këtu është ai qëllimi dhe poenta që të sensibilizohen institucionet dhe organizatat e shoqërisë jo qeveritare, mbështetja në aspektin material, moral. Në mënyrë që të shkon trajtimi i duhur i këtyre fëmijëve, të jenë baras me fëmijë të tjerë”, përfundoi ajo.

Ndryshe prej doktoreshave një rrëfim tjetër ka pasur, Sami Leku një qytetar nga komuna e Drenasit, ku vajza e tij tash tetë vite ka Spina Bifidën.

Ai thotë se gjatë këtyre viteve u përballë me sfida të ndryshme duke e trajtuar tek mjekët pa asnjë ndihmë institucionale.

Përkundër kësaj, ai është shprehur i kënaqur momentalisht me rikuperimin e vajzës së tij, megjithëse ka pasur gjashtë intervenime.

“Për fat të mirë, vajzën e kam shumë mirë, përkundër disa komplikimeve të vogla, por me krahasuar me raste të tjera është shumë mirë. Shkon në shkollë është në klasën e tretë, pak me këmbë ka probleme, por jam duke e trajtu tek ortopedët, në Shkup e kam operu, i ka gjashtë intervenime”, përfundoi ai.

Ndryshe, shtatë vitet e fundit, çdo 25 tetor ka aktivitete për këtë sëmundje në mënyrë që të vetëdijesohen qytetarët.