Rezoluta për shtesat e fëmijëve nuk kalon, shkak mungesa e deputetëve

Deputetja Donika Kadaj-Bujupi, e mbështetur edhe nga 7 deputetët nënshkrues nga Grupi Parlamentar i AAK-së,  propozoi Rezolutën për shtesat e fëmijëve, shkruan Periskopi.

“Çdo fëmijë në Kosovë prej 0 deri 16 vet të gëzojë shtesa çdo muaj duke filluar nga 10 euro pastaj sipas buxhetit dhe mundësive buxhetore dhe numri i fëmijëve në familje kjo shumë të rritet dhe të shtohet”, tha Kadaj – Bujupi gjatë prezantimit të Rezolutës.

Kjo u mbështet nga deputetët në sallë dhe Ministri i Punës dhe Mirëqenies Sociale, Skender Reçica.

Ministri theksoi se ky debat i cili ka të bëjë me trajtimin meritor të fëmijëve dhe trajtimin e mirëqenies dhe të ardhmes së fëmijëve, po vjen kur ne si ministri jemi në fund të një projektligji që do të përfshihen edhe shtesat.

“Ky do të jetë vit i reformave, ngaqë shumë qështje që do të prekin në mirëqenien sociale të fëmijëve dhe të qytetarëve kanë nevojë për reforma. Nuk do të duhej që nataliteti të jetë brengë e buxhetit.  Kemi raportin se kemi 16 mijë fëmijë më pak në shkolla dhe kjo është shqetësuese. Shtesat për fëmijë bënë pjesë në njërën nga skemat sociale të pensioneve. Po punojmë në draft projektin e dokumentit për skemat pensionale.  Duhet të kemi kujdes në harmonizimin e politikave dhe ligjeve që ndihmojnë fëmijët dhe lehonat”, ka thënë ministri Reçica.

Ky propozim nuk u votua për shkak të mungesës së deputetëve në sallë dhe për këtë e mori fjalën sërish deputetja , Donika Kadaj – Bujupi.

“Pavarësisht sa simbolike është shuma do të fillojë me 10 euro, do të mundohemi në bazë të mundësive buxhetore që kjo shtesë do të jetë sa më e madhe. Shpresoj që në seancën tjetër të kemi Rezolutën e harmonizuar dhe të jenë prezentë edhe deputetë të tjerë, sepse është për keqardhje që dy grupet parlamentare kanë bojkotuar seancën dhe nuk e votuan një propozim kaq të rëndësishëm dhe vital e që është strategji kombëtare për të ardhmen e vendit./Periskopi/.