PSD: Koeficienti i pagave në Shëndetësi dhe Arsim të ndryshohet rrënjësisht

Në prezantim u tha se PSD e përshëndet hartimin e ligjeve të pakos së reformimit të administratës publike, megjithëse këto hapa janë të vonuar dhe nuk garantojnë reformim të mirëfilltë të Administratës Publike, transmeton Periskopi.

Sipas deputetes, Shqipe Pantina, ligji më problematik në pakon e projektligjeve është ai për pagat që zgjoi reagim tëk punëtorët e sektorit publik.

“Me këtë ligj shteti është kujdesur që t’i forcojë sektorët që janë në shërbim të vetë, sesa sektorët që janë në shërbim të qytetarëve, si Shëndetësia dhe Arsimi. Ne vlerësojmë se një  qasje e tillë ndikon që shteti çdoherë të jetë i varur nga politika e jot ë jetë I ndërtuar mbi shtylla profesionale. Ligji krijon një proporcion shumë të madh në mes të pagës më të ulët në raport me pagën më të lartë. Po ashtu nuk respekton parimin për punë të barabartë , pagë të barabartë. P.sh në të njejtin nivel të gjykatave, prokurori paguhet më shumë se gjykatësi, ndonëse përgjegjësia mund të jetë e njejtë”, ka thënë Pantina.

Ajo në emër të PSD-së ka pasur një varg kritikash edhe për shtesat, ku numri dhe lloji i madh i tyre vetëm sa e legjitimon kaosin ekzistues në sistemin e pagave dhe nuk garanton transparencë.

“Ndonëse ne e mbështesim pakon e ligjeve, por ne konsiderojmë se sidomos shtojca e projektligjit për paga , pra tabela me koeficient duhet të ndryshohet rrënjësisht dhe t’i jep përparësi sistemit të shëndetësisë dhe të arsimit. Sepse pa forcimin e këtyre dy shtyllave, të cilat e qojnë përpara zhvillimin e shoqërisë ne nuk mund të flasim as për zhvillim ekonomik dhe as për sundim të ligjit.

Ndërsa, deputetja Besa Baftiu, Kryetare e Komisionit Parlamentar të Shëndetësisë, propozoi që Qeveria të ketë kujdes gjatë hartimit dhe të marrë përbazë kërkesat e puntorëve shëndetësor.

“PSD pajtohet plotësisht më të gjitha kërkesat duke filluar prej mjekëve specialistë, mjekëve të mjekësisë familjare, stomatologëve, infermierëve, stomatologëve dhe të tjerë.  Ne konsiderojmë që dallimi në koeficientë në mes të mjekëve specialist dhe mjekëve të mjekësisë familjare që gjithashtu janë specialist nuk duhet të ketë dallim. Sepse, nëse qeveria dhe ministria mendon ta ketë prioritet shëndetësinë atëherë duhet të ketë prioritet të krijojë barazi në mes të mjekësve specialist të të gjitha profileve. Një arsye e madhe për ta përkrahur sektorin e mjekësisë familjare është se ne në Kosovë nuk kemi mjek të mjaftueshëm të këtij profili”, ka thënë Baftiu./Periskopi/